தேங்காய் சட்னி / Coconut chutney

IMG_4442

இந்த சட்னி சமையலில் ஆரம்பநிலையில் உள்ள‌வர்களுக்கானது.அரைச்சு வையுங்க,ஓட்ஸ் கிச்சடி ரெஸிப்பியுடன் வருகிறேன்.

தேவையானவை:

தேங்காய் பத்தை_10
பச்சை மிளகாய்_2 அல்லது காரத்திற்கேற்ப‌
பொட்டுக்கடலை_1/2 கைப்பிடி
இஞ்சி_சிறு துண்டு
உப்பு_தேவைக்கு

தாளிக்க:

எண்ணெய்,கடுகு,உளுத்தம் பருப்பு,காய்ந்த மிளகாய்_1,பெருங்காயம், கறிவேப்பிலை.

செய்முறை:

தேங்காய்ப் பத்தையின் பின்புறமுள்ள கறுப்புப் பகுதியைக் கத்தியால் நீக்கிவிட்டு சிறுசிறு துண்டுகளாக்கி மிக்ஸியில் போட்டு,அதனுடன் இஞ்சி,பச்சைமிளகாய்,பொட்டுக்கடலை,உப்பு சேர்த்து இரண்டு சுற்று சுற்றினால் பூபூவாக மசிந்திருக்கும்.

அதில் சிறிது தண்ணீர் விட்டு மேலும் இரண்டு சுற்றுசுற்றி,நிறுத்திவிட்டு சுற்றியுள்ளதை வழித்துவிட்டு,மேலும் சிறிது தண்ணீர்விட்டு இரண்டு சுற்றுசுற்றினால் தேங்காய் சட்னி தயார்.

முதலிலேயே நிறைய தண்ணீரை ஊற்றிவிட்டால் மிக்ஸி ஓடும்போது தண்ணீர் வெளியில் தெறிக்கும்.அதனால் சிறிதுசிறிதாக தேவைக்கேற்றார்போல் ஊற்றி அரைக்கவும்.

அவரவர் விருப்பம்போல் சட்னியை கெட்டியாகவோ அல்லது மேலும் சிறிது தன்ணீர்விட்டு கரைத்தோ வைத்துக்கொள்ளலாம்.

ஒரு தாளிக்கும் கரண்டியில் எண்ணெய்விட்டு,சூடாக்கித் தாளிக்க வேண்டியப் பொருள்களைத் தாளித்து சட்னியில் கொட்டிக்கலக்கவும்.

இது இட்லி,தோசை,உப்புமா,பொங்கல்,கிச்சடி,அடை,வடை,பஜ்ஜி, போண்டா என எல்லாவற்றுக்கும் பொருத்தமாக இருக்கும்.

இதையே அம்மியில் வைத்து கெட்டியாக அரைத்து துவையலாகவும் பயன்படுத்தலாம்.அம்மியில் அரைப்பதானால் தேங்காயைத் துருவிக்கொண்டு அரைக்க வேண்டும்.

துவையல்/சட்னி இல் பதிவிடப்பட்டது . குறிச்சொற்கள்: , , , , . 22 Comments »

மிளகாய் பஜ்ஜி

நீண்ட நாட்களாக மிளகாய் பஜ்ஜி செய்ய வேண்டுமென ஆசை.ஆசையைத் தூண்டியது இந்தப்பதிவுதான்.சம்மர் வரட்டும் என்றிருந்தேன்.அப்போதுதான் மார்க்கெட்டில் விதவிதமான,கலர்கலரான மிளகாய்கள் வரும்.அவற்றில் காரமில்லாத இரண்டுவிதமான மிளகாய்கள் வாங்கியாச்சு.

எப்போதும் ஒரே விதமாக செய்வதற்கு பதில் கொஞ்சம் வித்தியாசமாக இருக்கட்டுமே என்று கடலைப்பருப்பை ஊறவைத்து அரைத்து செய்தேன்.இந்த ஐடியாவை எனக்கு சிலபல வருடங்களுக்கு முன்பு என் சகோதரி,”பஜ்ஜியை கடலைமாவில் செய்வதற்கு பதில் கடலைப்பருப்பை ஊறவச்சி அரைச்சு செஞ்சா சூப்பரா இருக்கும்”னு சொன்னாங்க.அதை நினைத்தே நானும் செய்தேன்.சூப்பராக வந்தது.

காரமேயில்லாத அந்த மிளகாய்கள் இவைதான்.

            

மிளகாயைக் கீரி அதன் உள்ளேயுள்ள விதைப்பகுதியை நீக்கிவிட்டு,காருமோ என பயந்து கழுவித் துடைத்துவிட்டு பஜ்ஜிக்குத் தயார் நிலையில் உள்ளன

மிளகாய் பஜ்ஜி தயாராகிவிட்டது.

சாப்பிட்ட திருப்தியில் இனி செய்முறையைப் பார்க்கலாம்.

தேவையானவை:

கடலைப் பருப்பு_ஒரு கப்
அரிசிமாவு_2 டீஸ்பூன்
காய்ந்த மிளகாய்_10
பூண்டிதழ்_5
பெருஞ்சீரகம்_சிறிது
பெருங்காயம்_சிறித்
ஓமம்_சிறிது
காரமில்லாத மிளகாய்கள்_கொஞ்சம்

செய்முறை:

கடலைப் பருப்பை ஊறவைத்துக் கழுவி நீரை வடித்துவிட்டு கிரைண்டரில் போட்டு மைய அரைக்கவும்.

அரைக்கும்போதே பெருஞ்சீரகம்,காய்ந்தமிளகாய்,பூண்டிதழ் சேர்த்து அரைக்கவும். மிளகாய் காரம் அதிகமாக இருப்பின் குறைத்து சேர்க்கவும்.நான் 10 மிளகாய் சேர்த்தும் சுத்தமாகக் காரமில்லை.

தேவையானால் சிறிது தன்ணீர் தெளித்து  மைய அரைத்தெடுக்கவும்.

மாவை ஒரு பாத்திரத்தில் எடுத்துக்கொண்டு அதனுடன் அரிசிமாவு, பெருங்காயம்,ஓமம்,உப்பு சேர்த்து இட்லி மாவு பதத்திற்குக் கரைத்துக்கொள்ளவும்.தேவையானால் அரிசிமாவைக் கொஞ்சம் அதிகமாகவே சேர்க்கலாம்.

ஒரு வாணலில் எண்ணெய் ஊற்றி அடுப்பிலேற்றி,எண்ணெய் காய்ந்ததும் மிளகாய்களை பஜ்ஜி மாவில் தோய்த்து,அதிகப்படியான மாவை வழித்துவிட்டு கவனமாக எண்ணெயில் போடவும்.

இதேமாதிரி எண்ணெய் கொண்டமட்டும் போடவும்.ஒருபக்கம் வெந்ததும் திருப்பிவிட்டு மறுபக்கமும் வெந்ததும் எடுக்கவும்.

இப்போது சுவையான மிளகாய் பஜ்ஜிகள் தயார்.

தேங்காய் சட்னியுடன் சாப்பிட சூப்பராக இருக்கும்.இல்லாவிடில் கெட்சப்புடனும் சாப்பிட நன்றாக இருக்கும்.

மீதமான மாவில் காலிஃப்ளவர்,வாழைக்காய் பஜ்ஜிகளும் போட்டாச்சு.

 

கீழேயுள்ளவை கடலை மாவில் செய்தவை.இதன் செய்முறையைக் காண இங்கே செல்லவும்.

மிளகாயின் நுனிப்பகுதியிலிருந்து அடிப்பகுதிவரை ஒரு பக்கம் மட்டும் கீறிவிட்டு அதனுள்ளே உள்ள விதைப்பகுதியை நீக்கிவிட்டு விருப்பமான மசாலாவை அடைத்து பஜ்ஜி மாவில் தோய்த்தும் பஜ்ஜி போடலாம்.

                                   

சிற்றுண்டி வகைகள் இல் பதிவிடப்பட்டது . குறிச்சொற்கள்: , , , , , . 6 Comments »

பஜ்ஜி

 

 

தேவையானப் பொருள்கள்:

கடலை மாவு_2 கப்
அரிசி மாவு_2 டீஸ்பூன்
மிளகாய்த் தூள்_2 டிஸ்பூன்
பெருங்காயம்_சிறிது
ஓமம்_சிறிது
சோடா உப்பு_ஒரு துளிக்கும் குறைவு
உப்பு_தேவையான அளவு
கடலை எண்ணெய்_பொரிக்கத் தேவையான அளவு

அரைக்க:

பெருஞ்சீரகம்_சிறிது
பூண்டு_2 பற்கள்

பஜ்ஜிக்கான காய்கள்:

வாழைக்காய்_1
கத்தரிக்காய்_சிறியதாக இருந்தால் 1
பெரிய சிவப்பு வெங்காயம்_1

eggplant ல் செய்வதாக இருந்தால் மாவின் அளவைக் கூட்டிக்கொள்ள வேண்டும்.

செய்முறை:

கடலை மாவு,அரிசி மாவு,மிளகாய்த் தூள்,பெருங்காயம்,சோடா உப்பு,உப்பு  இவற்றை ஒன்றாகக் கலந்து மாவு சலிக்கும் சல்லடையில் சலித்து ஒரு பாத்திரத்தில் எடுத்துக்கொள்.அதில் ஓமம் சேர்த்துக்கொள்.மேலும் பெருஞ்சீரகம்,பூண்டு இவற்றை ஒன்றாகச் சேர்த்து மைய அரைத்து மாவுடன் சேர்த்து சிறிது சிறிதாகத் தண்ணீர் சேர்த்து இட்லி மாவு பதத்தை விட சிறிது நீர்க்கக் கரைத்துக்கொள்.

பஜ்ஜிக்கு  வாழைக்காய்,கத்தரிக்காய் ( eggplant),பெரிய சிவப்பு வெங்காயம் இவற்றைப் பயன்படுத்தலாம்.

வாழைக்காயின் தோலை சீவி விட்டு,நுனிப்பகுதியை நறுக்கிவிட்டு,சிப்ஸ் கட்டையைப் பயன்படுத்தி வாழைக்காயை படத்தில் உள்ளது போல் நீள வாக்கில் நறுக்கிக்கொள். அல்லது குறுக்காகவும் சீவிக்கொள்ளலாம்.

வாணலியில் எண்ணெய் ஊற்றி அடுப்பில் வைத்து சூடுபடுத்து.எண்ணெய் காய்ந்ததும் சீவி வைத்துள்ள வாழைக்காயினை ஒவ்வொன்றாக எடுத்து மாவில் இருபுறமும் தோய்த்து எண்ணெயில் போடு.ஒருபக்கம் வெந்ததும் திருப்பிவிட்டு மறுபக்கம் வெந்ததும் எடுத்து விடு.இதுபோல் எல்லாவற்றையும் செய்துகொள்.

கத்தரிக்காயையும் அவ்வாறே சீவி வைத்துக்கொண்டு எண்ணெயில் போட்டுப் பொரிக்கலாம்.இதற்கு  eggplant     தான் நன்றாக இருக்கும்.அது இல்லாததால் சிறிய கத்தரிக்காயில் செய்துள்ளேன்.

அடுத்து பெரிய வெங்காயத்தை குறுக்காக வட்டமாக நறுக்கி ஒவ்வொரு வளையமாகத் தனித்தனியாகப் பிரித்து மாவில் தோய்த்துப் பொரிக்கலாம்.இது சுவை கூடுதலாக இருக்கும்.

இவை எல்லாவற்றிற்குமே தேங்காய் சட்னி நன்றாக இருக்கும்.அல்லது   ketchup  உடன் சேர்த்து சாப்பிடலாம்.