சென்னாகுனி தூள்

 

இது இட்லிக்கான தூள். இந்த தூள் இருந்துவிட்டால் இட்லி கணக்கில்லாமல் உள்ளே போகும். அவ்வளவு சுவையாக இருக்கும். உரலில் இடித்து, முடித்து அள்ளும்போது நாங்க எங்க அம்மாவிடம், ” அம்மா அம்மா, கொஞ்சம் தூளை அதிலேயே விட்டுடும்மா” என்று சொல்லி, சுட சுட நான்கைந்து இட்லிகளை உரலில் உள்ள தூளில் போட்டு ஒற்றி எடுத்து சாப்பிடுவோம். அதன் சுவைக்கு ஈடுஇணை ஏதும் கிடையாது. பின்னாளில் உதவுமே என இப்போதைக்கு பதிந்து வைத்துக்கொள்கிறேன்.

காராமணிகுப்பம் சந்தைக்கு போய் இந்த சென்னாகுனியை வாங்கி வருவாங்க. இது இளம் ஆரஞ்சு நிறத்தில் அல்லது வெண்ணிறத்தில் இருக்கும், பொடிஈஈஈ கருவாடு. நைநை’னு யாராவது தொந்தரவு பண்ணினா, ” சென்னாகுனி மாதிரி அரிச்சு எடுக்குற”னு சொல்லுவாங்க 🙂

இங்கு இது கிடைப்பது இல்லை. அதனால் என்னிடம் சென்னாகுனியின் படம் இல்லை. அதனால் பதிவு மட்டுமே 🙂

அளவுகளும் இன்னின்ன அளவுகள் என்று கிடையாது. அப்படியே போட்டுக்கொள்ள வேண்டியதுதான். எங்க அம்மா செய்வதை அப்படியே சொல்லிவிடுகிறேன். நமக்கு ஏற்றார்போல் அளவுகளை மாற்றி போட்டுக்கொள்ள வேண்டியது நாம்தான்.

வீட்டில் சின்னபடி, பெரியபடி என்று இருக்கும். எத்தனை கப்புகள் வரும் என்றெல்லாம் தெரியவில்லை. அதில் ஒரு சின்னபடி அளவுக்கு பொட்டுக்கடலையும், ஒரு கை அளவுக்கு சின்னாகுனியும், காரத்துக்கு காய்ந்த மிளகாயும், சுவைக்கு உப்பும் இருந்துவிட்டால் தூள் ரெடி பண்ணிடுவாங்க.

செய்முறை:

சின்னாகுனியில் மணல் இருக்கலாம். அதனால் அவற்றை முறத்தில் போட்டு லேசாகத் தேய்த்தாற்போல் செய்து புடைத்து பிரிச்சிடுவாங்க.

பிறகு இரும்பு வாணலை அடுப்பில் ஏற்றி, சூடானதும் சின்னாகுனியைப் போட்டு வாசம் வரும்வரை வறுத்து எடுத்து தனியாக வைத்துக்கொண்டு, அதே வாணலில் மிளகாயைப் போட்டு சூடேறும் வரை நிறம் மாறாமல் வறுத்துக்கொண்டு, தீயை அணைத்துவிட்டு பொட்டுக்கடலையையும் அதே வாணலிலேயேப் போட்டுவிட்டால் அதுவும் சூடேறிவிடும். பிறகு இவை ஆறியதும் உரலில் கொட்டி, உப்பு சேர்த்து இடித்து, சலித்து, காற்று புகா டப்பாவில் வைத்துக்கொண்டால் இட்லிக்கு அருமையான தூள் ரெடி.

இந்தத் தூளும், சாதாரண இட்லித் தூளும், சட்னியும், சாம்பாரும் இருந்தாலும் நாங்க எல்லோரும் இட்லிதோசைக்கு முதலில் எடுப்பது இதுவாகத்தான் இருக்கும். இந்தத் தூளுக்கு நல்லெண்ணெய் எல்லாம் விட்டு சாப்பிடக்கூடாது.

கிடைக்கும் பட்சத்தில் நீங்களும் செய்து பார்க்கலாமே !

சால்மன் ஃப்ரை / king salmon fry

20141224_123817

வேறு மீன் எதுவும் வாங்க முடியாத நேரத்தில் எப்போதாவது ஒரு சால்மன் மீன் துண்டு வாங்குவேன். குழம்பு வைக்கலாம், வைத்தால் அந்தளவுக்கு சுவை இருக்காது. ஃப்ரை பண்ணும்போது சூப்பராக இருக்கும். மெல்லிய துண்டுகளாக்குவது உங்கள் பொறுப்பு.

தேவையானவை :

மீன் துண்டுகள்
மிளகாய் தூள்/சாம்பார் பொடி _ தேவைக்கு
மஞ்சள் தூள் _ சிறிது
பூண்டு பல் _ விருப்பம்போல்
உப்பு _ தேவைக்கு
எலுமிச்சை _ பாதி பழம்

செய்முறை :

மீனை சுத்தம் செய்து துண்டுகளாக்கி, நன்றாகக் கழுவி நீரை வடியவிட‌வும்.

பூண்டுப்பல்லை தோலெடுக்காமல் அப்படியே ஒரு தட்டு தட்டி எடுத்துக்கொள்ளவும். தோலெடுத்துவிட்டு போட்டால் வேகும்போது அடி பிடிக்கும். தோலுடன் இருந்தால் பிரச்சினையில்லை. கடல் உணவுடன் பூண்டு சூப்பராகப் போகும்.

(உருளை, வாழைக்காய் பொரியல் என எல்லாவற்றுக்கும் இப்படியே சேர்த்துப் பாருங்களேன்).

ஒரு கிண்ணத்தில் மிளகாய்த்தூள், மஞ்சள்தூள், உப்பு மூன்றையும் போட்டு நன்றாகக் கலந்துகொள்ளவும்.

உப்பு & காரம் சரிபார்க்கவும். குறைந்தாலும் பரவாயில்லை. வேகும்போது கொஞ்சம் தூவிக்கொள்ளலாம்.

இப்போது நீர் வடிந்துவிட்ட மீன் துண்டுகளை ஒவ்வொன்றாக மிளகாய்த்தூளில் புரட்டி எடுத்து வேறொரு கிண்ணத்தில் வைக்கவும்.(மிளகாய்த்தூள் மீதமானால் மீன் குழம்பில் சேர்த்துக்கொள்ளலாம்)

எல்லா துண்டுகளையும் இவ்வாறே செய்த பின்பு மீன் துண்டுகளின்மேல் எலுமிச்சையைப் பிழிந்துவிடவும். இதை ஒரு அரை மணி நேரமாவது அப்படியே வைத்திருந்தால்தான் மீனில் மசாலா இறங்கி இருக்கும்.

ஒரு தோசைக்கல்லை அடுப்பிலேற்றி எண்ணெய் விட்டு பூண்டு போட்டு அப்படியே நான்கு ஐந்து மீன் துண்டுகளை அதில் போட்டு மேலேயும் கொஞ்சம் எண்ணெய் விட்டு மூடி போட்டு வேக வைக்கவும்.

ஒருபக்கம் வெந்து சிவந்ததும் திருப்பிவிட்டு மீண்டும் மூடி போட்டு வேகவிட்டு வெந்ததும் எடுத்துவிடவும். இவ்வாறே மீதமுள்ள மீன் துண்டுகளையும் வேகவைக்கவும்.

உடனே சாப்பிடுவதென்றால் சாப்பிடலாம். இல்லை பிறகு சாப்பிடுவதென்றால் நன்றாக ஆறிய பிறகு எடுத்து மூடி வைக்கவும்.

அசைவம் இல் பதிவிடப்பட்டது . குறிச்சொற்கள்: , , . Leave a Comment »

மீன் வாங்குவதில் பிரச்சினையா? இனி கவலைய விடுங்க!

பல‌ வருடங்களாக ஆராய்ச்சி செய்து (அதாங்க,சாப்பிட்டுப் பார்த்து) கண்டுபிடித்த விஷயம் யாருக்காவது பயன்படுமானால் சந்தோஷமே.

எங்கள் ஊர் கொஞ்சம் கடலூருக்குப் பக்கத்தில் என்பதால் அடிக்கடி ஏன் தினமுமேகூட மீன் சாப்பிடுவோம்.பெரிய சைஸ் மீன்களைவிட சின்ன‌ மீன்களைத்தான் வாங்குவாங்க.அதுதான் குழம்புக்கு நன்றாக இருக்கும். விருந்தினர்கள் வந்தாலொழிய வறுப்பதற்கும் சின்ன மீன்களைத்தான் வாங்குவோம்.எல்லாமே ஃப்ரெஷ்ஷாகக் கிடைக்கும்.

USA வந்த புதிதில் மீன் எங்கே வாங்கலாம் என ஒரு சிலரிடம் கேட்டு அவர்கள் சொன்ன கடைகளுக்குப் போய் பார்த்தால் எனக்கு சரிவரவில்லை.

சில மாதங்கள் சென்றபின் சுந்தர் 99 Ranch க்கு கூட்டிப்போனார்.அது ஒரு chinese grocery store.அங்கு east asian பொருட்கள் கிடைக்கும்.

போகும்போதே சில‌ரிடம் மீன்களின் பெயர்களைக் கேட்டதற்கு catfish, tilapia வாங்கலாம் என்றன‌ர்.அங்குபோய் பார்த்தால் நிறைய வெரைட்டியில் ஏகப்பட்ட பழைய & புதிய‌ மீன்கள்.எதை செலக்ட் செய்வது எனத் தெரியவில்லை.

அவர்கள் சொன்ன மாதிரியே,இருப்பதிலேயே சின்னதாக இருந்த catfish வாங்கிவந்து குழம்பு வைத்தேன்.எங்கம்மா வைக்கும் குழம்பிற்கும் இதற்கும் சம்மந்தமே இல்லை.

அடுத்த முறை சென்றபோது டிலாஃபியா வாங்கிவந்தேன்.அதுவும் சுத்தமாகப் பிடிக்கவில்லை.

ஒரு சமயம் butter fish என இருந்ததைப் பார்த்து நம்ம ஊர் காரை மீன் மாதிரி தெரியவும் வாங்கிவந்து செய்தால் ம்ஹூம்,நன்றாகவே இல்லை. இப்படியே சில வருட‌ங்கள் போனது.

இரண்டுமூன்று வருடங்களுக்குமுன் கடைக்குப் போனபோது ஒரு மலையாளப்பெண் வந்தார்.நேராக pomfret/ வௌவால் மீனை எடுத்து எடை போடச்சொன்னார்.

நான் நைஸாக அவரிடம் எப்படி இதை தெரிவு செய்தீர்கள்? என்றேன்.அவர் அழகாக ஒரு விளக்கம் கொடுத்தார்.Farm raised மீன் வாங்கினால் அதில் சத்துகள் ஒன்றும் இருக்காது.கடல் மீன்களில்தான் எல்லா சத்துகளும் இருக்கும். எனவே wild caught fishஆ என பார்த்து வாங்குங்க.White,black இரண்டு pomfretகளுமே நன்றாக இருக்கும்.இப்போ இதுகூட புதுசாதானே இருக்கு என்று மீனின் gill பகுதியைப் பிரித்துக்காட்டினார்.

White pomfret என்னைக் கவர்ந்ததால் அதில் இரண்டை  எடுத்துக்கொண்டு அவருக்கு ஒரு பெரிய நன்றி சொல்லிவிட்டு வந்தேன்.குழம்பு&ஃப்ரை இரண்டுமே நன்றாக இருந்தது.அடிக்கடி சென்று இந்த மீனை வாங்கிக்கொண்டு வந்தேன்.ஆனால் ஊரில் எங்கள் வீட்டில் இதை வாங்கமாட்டார்கள்.

ஒரு சமயம் போனபோது pomfret ஃப்ரெஷ்ஷாக இல்லை.கடல் மீனில் எது வாங்கலாம் என தேடி red tail snapper வாங்கினேன்.இப்போதுதான் நம்ம ஊர் குழம்பின் மணம் வந்தது.

வேறொரு சமயம் இது புதிதாக இல்லை.எனவே துணிந்து yellow  tail snapper வாங்கினேன்.அதைவிட இது சூப்பராக இருந்தது.

ஒரு சமயம் red snapper வாங்கினேன்.சூப்பரோ சூப்பராக இருந்தது.

அடுத்த முறை கொஞ்சம் துணிந்துவிட்டேன்.Golden red snapper வாங்கினேன்.இது எல்லாவற்றுக்கும் சிகரம் வைத்தாற்போல் சூப்பரோ சூப்பராக இருந்தது.

இனிமேல் கவலையே இல்லை.மேலேயுள்ள மீன்களில் எவை இல்லையென்றாலும் snapper என்றிருந்தால் துணிந்து வாங்கிவிடலாம் என்று தீர்மானம் செய்துவிட்டேன்.இது நம்ம ஊர் சங்கரா மீனின் சுவையில் உள்ள‌து.

எதற்கும் சுவை வாரியாக வரிசைப்படுத்தி விடுகிறேனே.#1 Golden red snapper,#2 red snapper,#3 yellow tail snapper,#4 red tail snapper,#5 pomfret.ஆனாலும் வாங்குவது புது மீனாக இருக்கட்டும்.

அசைவம் இல் பதிவிடப்பட்டது . குறிச்சொற்கள்: , , . 2 Comments »

ஆம்லெட்/Omelet (மற்றொரு முறை)

omelet

தேவையானவை:

முட்டை_2
பால்_ஒரு டீஸ்பூன்
மிளகு 4 பொடித்துக்கொள்ளவும்.
உப்பு_சிறிது
பட்டர் அல்லது எண்ணெய்_சிறிது

செய்முறை:

ஒரு கடாயை அடுப்பில் ஏற்றவும்.தீ மிதமாக இருக்கட்டும்.

ஒரு பௌளில் முட்டையை உடைத்து ஊற்றி whisk ஆல் நன்றாகக் கலக்கவும்.

பிறகு பால்,உப்பு சேர்த்து நன்கு கலக்கவும்.

கடாயில் பட்டரைப் போட்டு அது கரைந்ததும் முட்டைக் கலவையை ஊற்றி லேஸாக சுழற்றி விடவும் அல்லது அதுவாகவே சுற்றிலும் பரவிவிடும்.

பாதி வேகும்போதே மிளகுத்தூளை ஆம்லெட் முழுவதும் தூவி முற்சூடு செய்த அவனில் ஒரு சில நிமிடங்கள் வைத்து எடுக்கவும்.இவ்வாறு செய்வதால் மேல் பகுதியும் நன்கு வெந்துவிடும்.கடாய் oven safe உள்ள‌தாக இருக்கட்டும்.

படத்தில் காட்டியுள்ளவாறு ஒரு தட்டில் வைத்து மேலே சிறிது மிளகுத்தூளைத் தூவிவிடவும்.

எளிதாகச் செய்யக்கூடிய சுவையான ஆம்லெட் தயார்.

மிளகுத்தூளிற்குப் பதிலாக பொடியாக நறுக்கிய சின்ன வெங்காயம் + பச்சைமிளகாய்,வெங்காயத்தாள்,துருவிய சீஸ் போன்று நமக்கு விருப்பமானதைப் போட்டு அலங்கரித்துக்கொள்ளலாம்.

அசைவம், சிற்றுண்டி வகைகள் இல் பதிவிடப்பட்டது . குறிச்சொற்கள்: , , , . 4 Comments »

அரைத்துவிட்ட மீன் குழம்பு/வறுத்தரைச்ச மீன் குழம்பு/Araithu vacha fish kuzhambu

மீன் குழம்பிற்கு சிறுசிறு மீன்களாக இருந்தால் நன்றாக இருக்கும்.நான் செய்திருப்பது நடுத்தர அளவிலான வெள்ளை வௌவால் மீனில்(White pomfret).இக்குழம்பை சாதாரண மிளகாய்த்தூள் சேர்த்தும் செய்யலாம்.

தேவையானவை:

மீன்_1
புளி_சிறு எலுமிச்சை அளவு
சின்ன வெங்காயம்_7
தக்காளி_பாதி
பூண்டு_பாதி

வறுத்து அரைக்க:

கொத்துமல்லி விதை_2 கைப்பிடி
காய்ந்த மிளகாய்_5 (காரத்திற்கேற்ப கூட்டிக் குறைத்துக்கொள்ளவும்)
மிளகு_5
சீரகம்_1/2 டீஸ்பூன்
மஞ்சள்_சிறு துண்டு
வெந்தயம்_சிறிது
தேங்காய் பூ_2 டீஸ்பூன்

தாளிக்க:

நல்லெண்ணெய்
வடகம்
வெந்தயம்
கறிவேப்பிலை

செய்முறை:

மீனை சுத்தம் செய்து,துண்டுகளாக்கி,உப்புபோட்டு நன்றாகக் கழுவிவிட்டு நீரை வடிய வைக்கவும்.

புளியை மூழ்கும் அளவு தண்ணிரில் ஊற வைக்கவும்.

வறுத்து அரைக்க வேண்டியதை(மஞ்சள் தவிர்த்து)வெறும் வாணலில் தனித்தனியாக சிவக்க வறுக்கவும்.ஆறியதும் மிக்ஸியில் போட்டு நைஸாகப் பொடிக்கவும்.அல்லது தண்ணீர்விட்டு மைய அரைத்தெடுக்கவும்.

வெங்காயம்,பூண்டு உரித்து விருப்பம்போல் அரிந்து/தட்டி வைக்கவும்.தக்காளி நறுக்கி வைக்கவும்.

குழம்பு வைக்கும் பாத்திரத்தை அடுப்பிலேற்றி,எண்ணெய் விட்டு,தாளிக்க வேண்டியதைத் தாளித்துவிட்டு,வெங்காயம்,பூண்டு,தக்காளி இவற்றை அடுத்தடுத்து சேர்த்து வதக்கவும்.

வதங்கியதும் புளித்தண்ணீரைக் கெட்டியாகக் கரைத்து ஊற்றி,பொடித்து வைத்துள்ள பொடி/அரைத்து வைத்துள்ள மசாலாவைச் சேர்த்து,உப்பு போட்டு மூடி நன்றாக கொதிக்க வைக்கவும்.

குழம்பு நன்றாகக் கொதித்து எண்ணெய் பிரிந்தாற்போல் வரும்போது மீன் துண்டுகளைச் சேர்த்து,மிதமானத் தீயில் கொதிக்க விடவும்.தீ அதிகமானால் மீன் உடைந்துவிடும்.

ஒரு 5 நிமி கொதித்த பிறகு மீன் துண்டுகளைத் திருப்பிவிட்டு,மேலும் ஒன்றிரண்டு நிமி கொதிக்க விட்டு இறக்கிவிடவும்.

இது சாதம்,இட்லி,தோசை இவற்றுக்கு சூப்பராக இருக்கும்.

அசைவம், குழம்பு இல் பதிவிடப்பட்டது . குறிச்சொற்கள்: , , , , , , . 4 Comments »

ஸ்டஃப்டு சில்லீஸ்/Stuffed chillies

கேப்ஸிகம் என்றாலே வீட்டில் யாருக்கும் பிடிப்பதில்லை.அதிலும் ஸ்டஃப்டு கேப்ஸிகம் என்றால் அவ்வளவுதான். அதனால் கேப்ஸிகத்திற்கு பதில் படத்திலுள்ள குட்டிகுட்டி மிளகாய்களைப் பயன்படுத்தி,பிடித்தமான ஃபில்லிங் வைத்து இந்த ஸ்டஃப்டு சில்லீஸ் செய்தேன்.பார்க்க அழகாகவும், சாப்பிட நன்றாகவும் இருந்தது..

      

சிக்கன்,உருளை வறுவல் செய்த அன்று இந்த ஸ்டஃப்டு சில்லீஸ் செய்தேன். சுவையாக இருந்தது.அல்லது உங்களுக்குப் பிடித்தமான மசாலாவை வைத்தும் செய்துகொள்ளலாம்.

மிளகாயைக் கழுவி சுத்தம் செய்து,முழுவதுமாக இரண்டாகக்கீறி, விதைப்பகுதியை நீக்கிவிட்டு,அதில் மசாலாவை வைத்து,அதன் மேலே ஒரு சொட்டு ஆலிவ் ஆயில் தொட்டு வைத்து,ஓவன் சேஃப் பேனில் அலுமினம் ஃபாயிலைப் போட்டு அதில் மிளகாயை அடுக்கிவைத்து,350 டிகிரியில் ஒரு 10 நிமி பேக் செய்யவும்.

மசாலா காய்ந்தது மாதிரி இல்லாமல் இருக்கத்தான் எண்ணெய் வைப்பது.10 நிமிடங்களில் அருமையான ஸ்டஃப்டு சில்லீஸ் தயார்.சிறிது ஆறியதும் அப்படியே அல்லது டொமடோ கெட்சப்புடன் சாப்பிடலாம்.

அல்லது உங்கள் விருப்பம்போல் முழு மிளகாயின் ஒரு பக்கத்தில் நீளவாக்கில் கீறி அதனுள்ளே மசாலாவை வைத்து பேக் செய்தாலும் நன்றாக இருக்கும்.

அசைவம், சிற்றுண்டி வகைகள் இல் பதிவிடப்பட்டது . குறிச்சொற்கள்: . 6 Comments »

சிக்கன் மஷ்ரூம் வறுவல்

 

தேவையானவை:

chicken thigh_2 (or) chicken breast_1
மஷ்ரூம்_5 பெரியது
சின்ன வெங்காயம்_10
தக்காளி_பாதி
பச்சைமிளகாய்_1
இஞ்சி_ஒரு துண்டு
பூண்டிதழ்_3
மிளகாய்த்தூள்_3 டீஸ்பூன்
மஞ்சள்தூள்_சிறிது
உப்பு_தேவைக்கு
புதினா&கொத்துமல்லி

தாளிக்க:

எண்ணெய்
கிராம்பு_3
பட்டை_1
பிரிஞ்சி இலை_1
சீரகம்

செய்முறை:

சிக்கனை விருப்பமான வடிவத்தில் நறுக்கிக் கழுவீவிட்டு சிறிது தயிர், மிளகாய்த்தூள்,மஞ்சள்தூள் சேர்த்து பிசறி ஒரு 1/2 மணி நேரத்திற்கு ஃப்ரிட்ஜில் வைக்கவும்.

இஞ்சி,பூண்டு தட்டிவைக்கவும்.மஷ்ரூம்,வெங்காயம்,தக்காளி,பச்சைமிளகாய் இவற்றை நறுக்கி வைக்கவும்.

ஒரு வாணலை அடுப்பிலேற்றி எண்ணெய் விட்டு தாளிக்க வேண்டியவற்றைத் தாளித்துவிட்டு இஞ்சிபூண்டு சேர்த்து வதக்கவும்.

பிறகு வெங்காயம்,பச்சைமிளகாய்,தக்காளி,மஷ்ரூம் இவற்றை அடுத்தடுத்து சேர்த்து வதக்கவும்.

இவை நன்றாக வதங்கியதும் சிக்கனை சேர்த்து வதக்கவும்.

இவை வதங்கியதும் மிளகாய்த்தூள்,மஞ்சள்தூள்,உப்பு சேர்த்துக் கிளறி மூடி வேகவிடவும்.தண்ணீர் சேர்க்க வேண்டாம்.சிக்கன்,மஷ்ரூம் இவை வேகும்போது வெளிவரும் தண்ணீரே போதுமானது.

சிக்கன் நன்றாக வெந்து,தண்ணீர் முழுவதும் வற்றியதும் எலுமிச்சை சாறு விட்டு,புதினா&கொத்துமல்லி தூவி இறக்கவும்.

அசைவம், வறுவல்/பொரியல் இல் பதிவிடப்பட்டது . குறிச்சொற்கள்: , , , , . Leave a Comment »