பாஸ்தா (மற்றொரு முறை)


தேவையானப் பொருள்கள்:

விருப்பமான பாஸ்தா_2 கப்
விருப்பமான பாஸ்தா சாஸ்_3 டீஸ்பூன் அல்லது தேவைக்கேற்ப‌ (தக்காளி,பூண்டு,பேஸில் உள்ளது)
டோஃபு_1/4 பாகம்
விருப்பமான குடை மிளகாய்_பாதி
பச்சைப் பட்டாணி_1/2 கைப்பிடி
சின்னவெங்காயம்_2
மிளகாய்த்தூள்_ஒரு டீஸ்பூன்
மஞ்சள் தூள்_சிறிது
கொத்துமல்லி இலை_ஒரு கொத்து
உப்பு_தேவைக்கு

தாளிக்க:

ஆலிவ் ஆயில்_2 டீஸ்பூன்
சீரகம்

செய்முறை:

கீழேயுள்ள செய்முறையை பாஸ்தா வெந்துகொண்டிருக்கும்போதே செய்துகொள்ளவும்.

டோஃபுவில் உள்ள தண்ணீரை வடித்துவிட்டு விருப்பமான வடிவத்தில் நறுக்கி ஒரு நான்ஸ்டிக் பேனில் சிறிது ஆலிவ் ஆயில் விட்டு சூடேறியதும் டோஃபுவைப் போட்டு சிறிது மிளகாய்த்தூள்,உப்பு தூவி ஃப்ரை செய்து வைக்கவும்.

வெங்காயம் நறுக்கி வைக்கவும்.மிளகாயையும் ஏதாவதொரு வடிவத்தில் நறுக்கிக்கொள்ளவும்.

ஒரு நான்ஸ்டிக் பேனை அடுப்பில் ஏற்றி,எண்ணெய் விட்டு சீரகம் தாளித்துவிட்டு,வெங்காயம் சேர்த்து வதக்கவும்.

அது வதங்கியதும் மிளகாய்,பட்டாணி சேர்த்து வதக்கவும்.இவை வதங்கும்போதே மிளகாய்த்தூள்,மஞ்சள்தூள்,உப்பு சேர்த்து வதக்கவும்.

இவை வதங்கியதும் பாஸ்தா சாஸ் சேர்த்துக் கிளறிவிடவும்.இதில் உள்ள காய்கள் வேக,வெந்துகொண்டிருக்கும் பாஸ்தாவிலிருந்து இரண்டு அல்லது மூன்று கரண்டி தண்ணீரை எடுத்து ஊற்றவும்.

காய் வெந்து,ஓரளவு தண்ணீர் வற்றியதும் டோஃபுவை சேர்த்துக் கிளறி,அடுப்பை நிறுத்திவிட்டு,வெந்த பாஸ்தாவைக் கொட்டிக்கிளறி, கொத்துமல்லி தூவி இறக்கவும்.

கீழே உள்ளதில் கேரட்,பீன்ஸ்,பட்டாணி,பச்சை குடைமிளகாய் சேர்த்துள்ளேன்.

Advertisements

சாதாரன பாஸ்தா


      

தேவையானப் பொருள்கள்:

விருப்பமான பாஸ்தா_2 கப்
சின்னவெங்காயம்_3
தக்காளி_1
இஞ்சி_சிறிது
பூண்டு_1
மிளகாய்த்தூள்_1/4 டீஸ்பூன்
உப்பு_தேவைக்கு

தாளிக்க:

ஆலிவ் ஆயில்_2 டிஸ்பூன்
கிராம்பு_1
பிரிஞ்சி இலை_1
சீரகம்

செய்முறை:

வெங்காயத்தில் இரண்டு,இஞ்சி,பூண்டு,தக்காளி இவற்றை மிக்ஸியில் போட்டு அரைத்தெடுக்கவும்.

மற்றொரு வெங்காயத்தைப் பொடியாக நறுக்கி வைக்கவும்.

ஒரு வாணலியில் எண்ணெய் விட்டு தாளிக்கக் கொடுத்துள்ளப் பொருள்களை ஒன்றன்பின் ஒன்றாகத் தாளித்துவிட்டு வெங்காயம் சேர்த்து வதக்கவும்.

அடுத்து அரைத்த விழுதை சேர்த்து வதக்கவும்.வதங்கும்போதே மிளகாய்த்தூள்,மஞ்சள்தூள் சேர்த்து வதக்கவும்.

சிறிது தண்ணீர் தெளித்து வேக வைக்கவும்.இஞ்சி,பூண்டின் பச்சை வாசனை போகட்டும்.

நன்றாக வெந்து எண்ணெய் பிரிந்து வரும்போது அடுப்பை நிறுத்திவிட்டு வேக   வைத்துள்ள பாஸ்தாவை சேர்த்துக் கிளறி விடவும்.

பாஸ்தா வேக வைக்கும் முறை இங்கே உள்ளது.

தேவையானால் கொத்துமல்லி இலை சேர்த்து இறக்கலாம்.

பாஸ்தா

விதவிதமான வடிவங்கள் மட்டுமல்லாது பல்வேறு தானியங்களினாலான‌ பாஸ்தா கிடைக்கிறது. இதற்கென     seasonings, pasta sauce  உள்ளன.இதனை எப்படி வேண்டுமானாலும் தயாரித்துக்கொள்ளலாம்.எப்படி செய்தாலும் சுவைதான்.

பாஸ்தாவை சேர்க்கும்போது அடுப்பை நிறுத்திவிட்டுத்தான் சேர்க்க வேண்டும்.அப்போதுதான் அதற்கேயுரித்தான அதன் வழவழப்புத்தன்மை இருக்கும்.

மிளகாய்த்தூள் சேர்ப்பதானால் காய்கறி வதங்கும்போது சேர்த்துக்கொள்ளலாம். Garnish mix  என்றால் கடைசியில் சேர்த்துக்கொள்ளலாம்.

தேவையானப் பொருள்கள்:

பாஸ்தா_2 கப்

விருப்பமான காய் கறிகள்_ (கேரட், பீன்ஸ், உருளைக்கிழங்கு ,பச்சைப்பட்டாணி, காலிஃப்ளவர், புரோக்கலி, வெங்காயத்தாள் ,கலர்கலரான குடைமிளகாய்கள்_இவற்றுள் இருப்பதைக்கொண்டு தயார் செய்யலாம்.)

சின்னவெங்காயம்_2
பச்சைமிளகாய்_1
தக்காளி_பாதி
இஞ்சி_சிறிது
பூண்டு_1
மிளகாய்த்தூள்_1/4 டீஸ்பூன்  அல்லது  நூடுல்ஸிலுள்ள    garnish mix    _ கொஞ்சம்
உப்பு_தேவைக்கு

தாளிக்க:

ஆலிவ் ஆயில்_2 டிஸ்பூன்
கிராம்பு_1
பிரிஞ்சி இலை_1
சீரகம்

செய்முறை:

ஒரு பாத்திரத்தில் பாஸ்தா  மூழ்கும் அளவை விட இரண்டு மடங்கு தண்ணீர் எடுத்துக்கொண்டு அடுப்பிலேற்றி கொதிநிலை வரும்போது தேவையான உப்பு சேர்த்து,மீண்டும் தண்ணீர் கொதிக்க ஆரம்பித்ததும் பாஸ்தாவைக்கொட்டி ஒரு கரண்டியால் கிண்டிவிடவும்.ஒன்றுக்கொன்று ஒட்டாமல் வேகுமாறு அடிக்கடி கிண்டிவிடவும்.நன்றாக வேக குறைந்தது 20 நிமிடங்களாவது ஆகும்.நன்றாக வெந்துவிட்டால் கரண்டியில் எடுத்தால் வராமல் வழுக்கிக்கொண்டு போகும்.இப்போது ஒரு கப் குளிர்ந்த நீரை வெந்துகொண்டிருக்கும் பாஸ்தாவில் ஊற்றி அடுப்பை நிறுத்திவிடவும்.இது வெந்துகொண்டிருக்கும் பாஸ்தா மேலும் வேகாமலிருக்கத்தான்.பிறகு நீரை வடித்துவிடலாம்.

பாஸ்தா வெந்துகொண்டிருக்கும்போதே தாளிப்பை ஆரம்பிக்க வேண்டும்.

இஞ்சி,பூண்டு தட்டி வைக்கவும்.வெங்காயம்,பச்சைமிளகாய்,தக்காளி இவற்றை நறுக்கி வைக்கவும்.தக்காளியை அரைத்துக்கூட சேர்த்துக்கொள்ளலாம்.காய்கறிகளை பாஸ்தாவின் வடிவத்திற்கேற்ப நறுக்கிக்கொள்ளவும்.பச்சைப்பட்டாணி சேர்ப்பதானால் முதல்நாளிரவே ஊற வைத்து விடவும்.

ஒரு வாணலியில் எண்ணெய் ஊற்றி தாளிக்க உள்ளவற்றைத் தாளித்துவிட்டு இஞ்சிபூண்டு சேர்த்து வதக்கவும்.பிறகு வெங்காயம்,பச்சை மிளகாய்,தக்காளி இவற்றை அடுத்தடுத்து சேர்த்து வதக்கவும்.பிறகு காய்கறி சேர்த்து வதக்கவும்.

வதங்கியதும் சிறிது உப்பு சேர்த்துக் கிளறிவிட்டு மிதமானத் தீயில் வேக வைக்கவும்.வேண்டுமானால் காய் வேக சிறிது தண்ணீர் தெளித்துக்கொள்ளவும்.

காய் வெந்ததும் அடுப்பை நிறுத்திவிட்டு  garnish mix  கலந்துவிட்டு, வடித்துவைத்துள்ள பாஸ்தாவை எடுத்துக்கொட்டி கிளறிவிடவும்.

இப்போது சுவையான பாஸ்தா தயார்.