போளி

boliboli

தேவையானப் பொருள்கள்:

மேல் மாவிற்கு:‍

மைதா_4 கப்
சர்க்கரை_ஒரு துளி ( for taste )
உப்பு_ஒரு துளி ( for taste )
மஞ்சள் தூள்_1/2 டீஸ்பூன்
எண்ணெய்_ஒரு டேபிள்ஸ்பூன்

பூரணம் செய்வதற்கு:

கடலைப் பருப்பு_1 கப்
துவரம் பருப்பு_1 கப்
வெல்லம்_2 கப்
ஏலக்காய்_2

செய்முறை:

முதலில் மைதாவை சலித்து எடுத்துக் கொண்டு அதனுடன் சர்க்கரை, உப்பு,மஞ்சள் தூள் சேர்த்து கலந்துவிட்டு, எண்ணெயை சேர்த்து மாவு முழுவதும் பரவுமாறு நன்றாகப் பிசைந்து சிறிது சிறிதாக தண்ணீர் விட்டு சப்பாத்தி மாவு பதத்திற்கு பிசைந்து எண்ணெய் தடவி மூடி வைக்கவும்.

அடுத்து பூரணம் செய்வதற்கு கடலைப் பருப்பு,துவரம் பருப்பு இரண்டையும் நன்றாகக் கழுவிவிட்டு தேவையானத் தண்ணீர் ஊற்றி வேக வைக்கவும்.

மிகவும் குழைந்து போகாமல் மலர வேக வைக்க வேண்டும். வெந்ததும் நீரை வடித்து விடவும்.நீர் இருந்தால் பூரணம் கொழ கொழப்பாகிவிடும்.

நீர் முழுவதும் வடிந்த பிறகு நனைத்துப் பிழிந்த ஒரு பேப்பர் டவல் (அ) துணியில் கொட்டி உலர்த்தினால் மீதமுள்ள நீரும் வற்றிவிடும்.

இப்போது வெந்த பருப்பை மிக்ஸியில் போட்டு மழமழவென நன்றாகப் பொடித்துக்கொள்ளவும்.பிறகு ஒரு அடி கனமான கடாயில் பருப்பு பொடியுடன்,வெல்லத்தைப் பொடித்துப் போட்டு அடுப்பில் வைத்து மிதமானத் தீயில் கிளறி விடவும்.

வெல்லம் கரைந்து சிறிது நீர்த்து வரும்.விடாமல் கிளறிக் கொண்டே இருக்க வேண்டும்.சிறிது நேரத்தில் நீர் வற்றி கெட்டியாக வரும்.அப்போது ஏலக்காயைப் பொடித்துப் போட்டுக் கிளறி இறக்கி ஆற வைக்கவும்.

போளி தட்டும் விதம்:

பூரணம் ஆறிய பிறகு சிறுசிறு எலுமிச்சை அளவிற்கு எடுத்து உருட்டி வைக்கவும்.

உருண்டையின் பாதி அளவிற்கு மேல் மாவில் இருந்து எடுத்து கையில் நல்லெண்ணெயைத் தொட்டுக்கொண்டு, உள்ளங்கை அகலத்திற்கு பரப்பிவிட்டு,அதன் நடுவில் பூரண உருண்டையை வைத்து மூடி,கவிழ்த்து வைத்து (பூரணம் வெளியில் வராமல்) சப்பாத்தி போல் கையாலேயே பரப்பி விடவும்.

எவ்வளவு அகலமாக‌ வேண்டுமானாலும் தட்டலாம்.பூரணம் சப்பாத்தியின் உள்ளே எல்லா இடத்திலும் பரவியிருக்க வேண்டும். அப்போதுதான் சாப்பிடும்போது சுவையாக இருக்கும்.

முதலில் ஒன்றிரண்டு தட்டுவதற்கு சிரமமாக இருக்கும்.அடுத்தடுத்து செய்யும்போது சுலபமாகி விடும்.

இதுபோல் தேவையானதைத் தயார் செய்துவிட்டு ஒரு தோசைக்கல்லை அடுப்பில் வைத்து சூடாக்கி நெய் (அ) எண்ணெயைப் பயன்படுத்தி கல்லில் போட்டு ஒருபக்கம் வெந்ததும் திருப்பிவிட்டு மறுபக்கம் வெந்ததும் எடுக்கவும்.

குறிப்பு:

இதனை கடலைப்பருப்பு,பச்சப்பருப்பு இவற்றை தனித்தனியாக வைத்தோ அல்லது கலந்தோகூட செய்யலாம்.

Advertisements

மைசூர் போண்டா

தேவையானப் பொருள்கள்:

உளுந்து_ ஒரு கப்
கடலைப் பருப்பு_1/2(அ) 1 கப்
மிளகு_1 டீஸ்பூன்
தேங்காய்_ஒரு துண்டு (சிறுசிறு பல்லாக நறுக்கிக்கொள்ளவும்)
இஞ்சி_சிறிது
பெருங்காயம்_சிறிது
உப்பு_தேவைக்கு
கடலை எண்ணெய்_பொரிக்கத் தேவையான அளவு

செய்முறை:

உளுந்து,கடலைப் பருப்பு இரண்டையும் தண்ணீரில் நனைத்து ஊற வைக்கவும்.குறைந்தது இரண்டு மணி நேரமாவது ஊறி இருக்க வேண்டும். நன்றாக ஊறிய பிறகு தோலி இல்லாமல் கழுவி நீரை வடித்து விட்டு உளுந்தை மட்டும் ஃபிரிட்ஜில் ஒரு அரை மணி நேரத்திற்கு வைத்திருந்து, பிறகு வெளியே எடுத்து கிரைண்டரில் போட்டு தண்ணீர் ஊற்றாமல் சுமார் அரை மணி நேரத்திற்காவது அரைக்க வேண்டும்.நல்ல பஞ்சு போல் பந்தாக வரும்.அப்போது  ஒரு பாத்திரத்தில் வழித்து நன்றாக அடித்துக் கொடப்பி வைக்கவும்.அதே கிரண்டரில் கடலைப் பருப்பைப் போட்டு தண்ணீர் ஊற்றாமல் மைய அரைக்கவும்.இந்த மாவை உளுந்து மாவுடன் சேர்த்து, மேலும் மிளகு,தேஙகாய்,இஞ்சி,பெருங்காயம்,உப்பு இவற்றையும் போட்டு நன்றாகப் பிசைந்து கொள்ளவும்.

ஒரு வாணலியில் எண்ணெய் ஊற்றிக் காய வைத்து மாவில் இருந்து சிறுசிறு உருண்டை அளவிற்கு எடுத்து லேசாக உருட்டி எண்ணெயில் போடவும். வேகும்போதே கரண்டியால் திருப்பி விட்டு வெந்து சிவந்ததும் எடுத்து விடவும்.இதுபோல் எல்லாவற்றையும் போட்டு எடுத்து சூடாகத் தேங்காய் சட்னியுடன் சாப்பிட சுவையாக இருக்கும்.

மசால் வடை (கடலைப் பருப்பு வடை)

 

தேவையான பொருள்கள்:

கடலைப் பருப்பு_2 கப்புகள்
சின்ன வெங்காயம்_ 10
இஞ்சி_ 1 துண்டு
பூண்டு_ 2பற்கள்
பச்சை மிளகாய்_2
பெருஞ்சீரகம்_1/4 டீஸ்பூன்
பெருங்காயம்_சிறிது
கறிவேப்பிலை_1 ஈர்க்கு
கொத்துமல்லி தழை_1/4 கட்டு
உப்பு_தேவையான அளவு

 செய்முறை:

முதலில் கடலைப் பருப்பை  2 மணி நேரத்திற்கு தண்ணீரில் ஊறவைக்க வேண்டும்.நன்றாக ஊறிய பிறகு கழுவி கலந்து நீரை வடித்து விட வேண்டும் கிரைண்டர் அல்லது மிக்ஸியில்  கடலைப் பருப்பை போட்டு அத்துடன் இஞ்சி,பெருஞ்சீரகம்,பச்சை மிளகாய்,பூண்டு இவற்றைப் போட்டு தண்ணீர் விடாமல் அரைக்க வேண்டும்.மிகவும் மைய அரைக்க வேண்டாம்      பிறகு மாவை வ்ழித்தெடுக்கவும்.  இப்பொழுது வெங்காயம கறிவேப்பிலை, கொத்துமல்லி தழை இவற்றை ப் பொடியாக அறிந்து  கொள்ளவும்.

இப்பொழுது மாவுடன்  பொடியாக அறிந்த வெங்காயம்,,கறிவேப்பிலை ,கொத்துமல்லி தழை,பெருங்காயம் சேர்த்து,தேவையான உப்பைப் போட்டு கலந்துகொள்ளவும்.மாவு வடை தட்டும் பதத்தில் இருக்கவேண்டும். இப்பொழுது வாணலியில் எண்ணெய் ஊற்றி அடுப்பில் ஏற்றி காயவைக்கவும்.எண்ணெய் நன்றாக காய்ந்த பிறகு மாவை சிறு உருண்டை அளவிற்கு எடுத்து உள்ளங்கையில் வைத்து வடை தட்டி எண்ணெயில் போட்டு ஒரு புறம் சிவந்ததும் திருப்பி விட்டு மறுபுறம் சிவந்ததும் எடுத்து விடவும். இதுபோல் எண்ணெய் கொண்ட மட்டும் தட்டிப் போடவும்.இப்பொழுது சுவையான,மொறுமொறுப்பான வடை தயார்.இதை தேங்காய்  சட்னியுடன் சாப்பிட நன்றாக இருக்கும்.

குறிப்பு:

வடை மாதிரி இல்லாமல் சிறு சிறு உருண்டைகளாகவும் அல்லது மாவைக் கையிலெடுத்து கிள்ளி கிள்ளி பக்கோடா மாதிரியும் போடலாம்.