காராபூந்தி

தேவையானவை:

கடலை மாவு_ஒரு கப்
அரிசிமாவு_2 டீஸ்பூன்
சமையல் சோடா_துளிக்கும் குறைவாக‌
தனி மிளகாய்த்தூள்_1/4 டீஸ்பூன்
வேர்க்கடலை_1/2 கைப்பிடி
முந்திரி_5
பெருங்காயம்_சிறிது
பூண்டுப்பல்_நான்கைந்து
கறிவெப்பிலை_கொஞ்சம்
உப்பு_தேவைக்கு

செய்முறை:

கடலைமாவு,அரிசிமாவு,சோடா உப்பு,உப்பு இவற்றை சல்லடையில் போட்டு இரண்டு தரம் சலித்து ஒரு கிண்ணத்தில் கொட்டிவைக்கவும்.

இதில் கொஞ்சம்கொஞ்சமாக தண்ணீர் விட்டு தோசை மாவு பதத்தைவிட கொஞ்சம் நீர்க்க,கட்டிகளில்லாமல் கரைத்து வைக்கவும்.Whisk ஐப் பயன்படுத்தினால் நன்றாக வரும்.

ஒரு வாணலில் எண்ணெய் ஊற்றிக் காய்ந்ததும் பூந்தி கரண்டியைப் பயன்படுத்தி பூந்திகளைப் போட்டுப் பொரித்தெடுக்கவும்.கரண்டி இல்லையெனில் சாதம் வடிக்கும் தட்டைக்கூடப் பயன்படுத்தலாம்.லட்டு பூந்தியைவிடக் கொஞ்சம் முறுகலாக‌ எடுக்க‌ வேண்டும்.

இவ்வாறே எல்லா பூந்திகளையும் போட்டு எடுத்தபிறகு அந்த எண்ணெயிலேயே கறிவேப்பிலை,பூண்டு (ஒன்றும் பாதியுமாக தட்டியது),வேர்க்கடலை,முந்திரி  இவற்றைப் போட்டுப் பொரித்து பூந்தியில் கொட்டவும்.கொஞ்சம் கவனம் தேவை.சமயங்களில் கடலை வெடிக்கவோ அல்லது வெடித்து  எண்ணெய் தெரித்து விழவோ வாய்ப்புண்டு.

இவற்றின் மீது மிளகாய்த்தூளைத் தூவி கலக்கவும்.இப்போது கரகர மொறுமொறு காராபூந்தி ரெடி.

இது எல்லா வகையான சாதத்திற்கும்,முக்கியமாக பொரியுடன் கலந்து சாப்பிட சூப்பராக இருக்கும்.

ஓமப்பொடி முறுக்கு

தேவையானவை:

கடலை மாவு_2 கப்
அரிசி மாவு_ஒரு கப்
ஓமம்_சிறிது
தனி மிளகாய்த்தூள்_1/2 டீஸ்பூன்(விருப்பமானால்)
பெருங்காயம்_கொஞ்சம்
உப்பு_தேவைக்கு
கடலை எண்ணெய்_தேவைக்கு

செய்முறை:

கடலை மாவு,அரிசி மாவு,மிளகாய்த்தூள்,உப்பு இவற்றை சல்லடையில் போட்டு ஒருமுறை சலித்தெடுக்கவும்.

இவற்றை  ஒரு பாத்திரத்தில் போட்டு அதனுடன் பெருங்காயம்,ஓமம் இவற்றைப் போட்டு சிறிதுசிறிதாகத் தண்ணீர் விட்டு பூரி மாவு பதத்தில் கெட்டியாகப் பிசைந்துகொள்ளவும்.

வாணலில் எண்ணெய் ஊற்றி அடுப்பிலேற்றி சூடுபடுத்தவும்.

எண்ணெய் காய்ந்ததும் முறுக்கு அச்சில் ஓமப்பொடி வில்லையைப்போட்டு அதில் கொள்ளுமளவிற்கு மாவைப் போட்டு நேராகவே வாணலில் பிழிந்துவிடவும்.

பிழிந்த சிறிது நேரத்திலே வெந்துவிடும்.உடனே மறுபக்கம் திருப்பிவிட்டு எடுத்துவுடவும்.கொஞ்சம் கவனம் தேவை.இல்லையென்றால் ரொம்பவே சிவந்துவிடும்.

ஆறியதும் கண்ணாடி டப்பாவில் அல்லது பிளாஸ்டிக் கவரில் எடுத்து வைத்துக்கொள்ளலாம்.

அல்லது லேஸாக நொறுக்கிவிட்டு கொஞ்சம் கறுவேப்பிலையை எண்ணெயில் பொரித்துப் போட்டுக் கலந்தால் ஓமப்பொடி மிக்ஸர் ரெடி.

இது சிறுபிள்ளைகள் (பெரியவர்களும்தான்)விரும்பி சாப்பிட ஏதுவாக மிகவும் சாஃப்டாக இருக்கும்.

குறிப்பு:

ஓமப்பொடி வில்லையின் துளைகள் பெரிதாக இருந்தால் ஓமத்தைக் கழுவி அப்படியே சேர்த்துக்கொள்ளலாம்.அல்லது துளைகள் சிறிதாக இருந்தால் ஓமத்தை மைய அரைத்துச் சேர்க்கலாம்.அல்லது அரைத்த விழுதை தண்ணீர் விட்டுக்கரைத்து வடிகட்டி அந்தத்தண்ணீரை மட்டும் சேர்த்துக்கொள்ளலாம்.

பெருங்காயத் தூளாக இருந்தால் அப்படியேயும்,கட்டியாக இருந்தால் சிறிது தண்ணீர் விட்டு கரைத்தும்சேர்க்கலாம்.

மற்ற ஓமப்பொடி அச்சுகளைவிட மரத்தாலான அச்சு பிழிவதற்கு ஏற்றதாக இருக்கும்.

காராசேவு

தேவையானப் பொருள்கள்:

கடலை மாவு_2 கப்
அரிசி மாவு_1/2 கப்
மிளகாய்த் தூள்_ஒரு டீஸ்பூன்
மிளகு_10 லிருந்து 15 எண்ணிக்கைக்குள்
பெருங்காயம்_சிறிது
உப்பு_தேவைக்கு

அரைத்து சேர்க்க:

கிராம்பு_2
பட்டை _சிறிது
கசகசா_1/4 டீஸ்பூன்
பூண்டு_ஒரு பல்

செய்முறை:

முதலில் கடலை மாவு,அரிசிமாவு,மிளகாய்த் தூள் இவ்ற்றை ஒன்றாகக் கலந்து சல்லடையில் சலித்து திப்பிகள் இருந்தால் நீக்கிவிடவும்.பிறகு மாவை ஒரு பாத்திரத்தில் கொட்டி அதனுடன் பெருங்காயம்,உப்பு,மிளகு (முழுதாகவோ அல்லது உடைத்தோ)  சேர்க்கவும்.எல்லாவற்றையும் நன்றாகக் கலந்து வைக்கவும்.

அரைக்கக் கொடுத்துள்ளப் பொருள்களை மைய அரைக்க முடிந்தால் அரைத்து மாவுடன் சேர்க்க வேண்டும்.இல்லை என்றால் அரைத்து வடிகட்டிய தண்ணீரை சேர்க்கவும்.

சிறிது சிறிதாக தண்ணீர் சேர்த்து மாவை முறுக்கு மாவு பதத்தில் பிசைந்துகொள்ளவும்.

ஒரு வாணலியில் தேவையான எண்ணெய் விட்டு காய வைக்கவும். கடைகளில் காரா சேவுக்கென்று கரண்டிகள் கிடைக்கும்.(நான் பயன்படுத்தியது கேரட் துருவி).

ஒரு கையால் கரண்டியைப் பிடித்துக்கொண்டு மற்றொரு கையால் மாவைத் தேய்க்க வேண்டும். எண்ணெய் நன்றாகக் காய்ந்ததும் மாவில் இருந்து ஒரு எலுமிச்சை அளவிற்கு எடுத்து கரண்டியின் மேல் மாவை வைத்து எண்ணெய்க்கு மேலாக உள்ளங்கையால் அழுத்தித் தேய்த்து விடவும்.

மாவு விரல் நீளத் துண்டுகளாக எண்ணெயில் விழும்.எண்ணெய் கொண்ட மட்டும் தேய்த்துவிடவும்.நன்றாக வேகும்வரை மற்றொரு கரண்டியால் திருப்பி விடவும்.வெந்ததும் எடுத்து விடவும்.

காராசேவு கரண்டியைப் பயன்படுத்த முடியாதவர்கள் மாவை தேன்குழல் அச்சில் போட்டு எண்ணெய்க்கு மேலாக அச்சைப் பிடித்துக்கொண்டு விரல் நீளத் துண்டுகள் வருமாறு அழுத்தி ஆள்காட்டி விரலால் மாவை அறுத்து விடவும்.இதுபோல் எண்ணெய் கொண்டமட்டும் செய்து நன்றாக வேகவிட்டு எடுக்கவும்.

பஜ்ஜி

 

 

தேவையானப் பொருள்கள்:

கடலை மாவு_2 கப்
அரிசி மாவு_2 டீஸ்பூன்
மிளகாய்த் தூள்_2 டிஸ்பூன்
பெருங்காயம்_சிறிது
ஓமம்_சிறிது
சோடா உப்பு_ஒரு துளிக்கும் குறைவு
உப்பு_தேவையான அளவு
கடலை எண்ணெய்_பொரிக்கத் தேவையான அளவு

அரைக்க:

பெருஞ்சீரகம்_சிறிது
பூண்டு_2 பற்கள்

பஜ்ஜிக்கான காய்கள்:

வாழைக்காய்_1
கத்தரிக்காய்_சிறியதாக இருந்தால் 1
பெரிய சிவப்பு வெங்காயம்_1

eggplant ல் செய்வதாக இருந்தால் மாவின் அளவைக் கூட்டிக்கொள்ள வேண்டும்.

செய்முறை:

கடலை மாவு,அரிசி மாவு,மிளகாய்த் தூள்,பெருங்காயம்,சோடா உப்பு,உப்பு  இவற்றை ஒன்றாகக் கலந்து மாவு சலிக்கும் சல்லடையில் சலித்து ஒரு பாத்திரத்தில் எடுத்துக்கொள்.அதில் ஓமம் சேர்த்துக்கொள்.மேலும் பெருஞ்சீரகம்,பூண்டு இவற்றை ஒன்றாகச் சேர்த்து மைய அரைத்து மாவுடன் சேர்த்து சிறிது சிறிதாகத் தண்ணீர் சேர்த்து இட்லி மாவு பதத்தை விட சிறிது நீர்க்கக் கரைத்துக்கொள்.

பஜ்ஜிக்கு  வாழைக்காய்,கத்தரிக்காய் ( eggplant),பெரிய சிவப்பு வெங்காயம் இவற்றைப் பயன்படுத்தலாம்.

வாழைக்காயின் தோலை சீவி விட்டு,நுனிப்பகுதியை நறுக்கிவிட்டு,சிப்ஸ் கட்டையைப் பயன்படுத்தி வாழைக்காயை படத்தில் உள்ளது போல் நீள வாக்கில் நறுக்கிக்கொள். அல்லது குறுக்காகவும் சீவிக்கொள்ளலாம்.

வாணலியில் எண்ணெய் ஊற்றி அடுப்பில் வைத்து சூடுபடுத்து.எண்ணெய் காய்ந்ததும் சீவி வைத்துள்ள வாழைக்காயினை ஒவ்வொன்றாக எடுத்து மாவில் இருபுறமும் தோய்த்து எண்ணெயில் போடு.ஒருபக்கம் வெந்ததும் திருப்பிவிட்டு மறுபக்கம் வெந்ததும் எடுத்து விடு.இதுபோல் எல்லாவற்றையும் செய்துகொள்.

கத்தரிக்காயையும் அவ்வாறே சீவி வைத்துக்கொண்டு எண்ணெயில் போட்டுப் பொரிக்கலாம்.இதற்கு  eggplant     தான் நன்றாக இருக்கும்.அது இல்லாததால் சிறிய கத்தரிக்காயில் செய்துள்ளேன்.

அடுத்து பெரிய வெங்காயத்தை குறுக்காக வட்டமாக நறுக்கி ஒவ்வொரு வளையமாகத் தனித்தனியாகப் பிரித்து மாவில் தோய்த்துப் பொரிக்கலாம்.இது சுவை கூடுதலாக இருக்கும்.

இவை எல்லாவற்றிற்குமே தேங்காய் சட்னி நன்றாக இருக்கும்.அல்லது   ketchup  உடன் சேர்த்து சாப்பிடலாம்.

மைசூர் பாக்

தேவையானவை:

கடலை மாவு_1 கப்
சர்க்கரை_1 கப்
நெய்_1 கப்
தண்ணீர்_3/4 கப்

செய்முறை:

கடலை மாவை நன்றாக சலித்து எடுத்துக்கொள்ளவும்.ஒரு வாணலியில் ஒரு டீஸ்பூன் அளவிற்கு எண்ணெய் அல்லது நெய் எடுத்துக் கொண்டு சூடாக்கவும். மிதமானத் தீயாக இருக்கட்டும்.அதில் மாவைக் கொட்டி வதக்கவும்.பச்சை வாசனைப் போக நன்றாக வதக்க வேண்டும்.அப்போதுதான் மாவைப் பாகில் சேர்க்கும் போது கட்டித் தட்டாமல் இருக்கும்.

ஒரு அடி கனமான வாணலியில் சர்க்கரை ,தண்ணீர் எடுத்துக்கொண்டு சூடுபடுத்தவும்.மற்றொரு அடுப்பில் ஒரு பாத்திரத்தில் நெய்யை எடுத்துக் கொண்டு சூடுபடுத்தவும்.இரண்டிலும் தீ மிதமாக இருக்கட்டும்.இப்போது சர்க்கரை கொஞ்சம் கொஞ்சமாகக் கரைந்து கொதிக்க ஆரம்பிக்கும்.ஒரு தோசைத் திருப்பியால் கிண்டிக்கொண்டே இருக்கவும்.நீளக் கம்பிப் பாகு பதம் வந்ததும் சிறிது சிறிதாக மாவை பாகில் கொட்டிக் கிளறவும்.(பாகை விரல்களில் எடுத்து உருட்டி விரல்களைப் பிரித்தால் நீளக் கம்பியாக வரும்.)விடாமல் கிளறிக் கொண்டே இருக்க வேண்டும்.மாவு முழுவதும் தீர்ந்த பிறகு சூடான நெய்யை ஒவ்வொரு ஸ்பூனாக எடுத்து கலவையில் ஊற்றிக் கிளறிக்கொண்டே இருக்கவும்.சூடாக நெய்யை ஊற்றும் போது மாவு வெந்து வருவது தெரியும்.வாசனை வந்து வெளுத்து நுரைத்து வாணலியில் ஒட்டாமல் வரும்போது ஒரு துளிக்கும் குறைவாக‌ சோடா உப்பை சேர்த்துக் கிளறி ஒரு நெய் தடவியத் தட்டில் கொட்டி சமப்படுத்தவும்.சிறிது ஆறியதும் தேவையான வடிவத்தில் துண்டுகள் போடவும்.நன்றாக ஆறிய பிறகு ஒரு கண்ணாடி பாட்டிலில் எடுத்து வைக்கவும்.

லட்டு

தேவையானப் பொருட்கள்

கடலை மாவு- 2கப்புகள்
அரிசி மாவு- 2 டீஸ்பூன்
சர்க்கரை- 1 1/2கப்புகள்
சோடா மாவு- 1/2 பின்ச்
தண்ணீர்-தேவையான அளவு
கிராம்பு-2
ஏலக்கய்-2
முந்திரி-10
உலர் திராட்சை-10
குங்குமப்பூ- 1 பின்ச்
கல்கண்டு- தேவையான அளவு
நெய்- 1/4 கப்
எண்ணெய்-தேவையான அளவு
செய்முறை:
முதலில் கடலை மாவுடன் அரிசி மாவு,சோடா மாவு இரண்டையும் கலந்து மாவு சலிக்கும் சல்லடையால் சலித்துக்கொள்ள வேண்டும்.பிறகு சிறிது சிறிதாக நீர் சேர்த்து தோசை மாவு பதத்திற்கு கரைத்துக்கொள்ள வேண்டும். வாணலியை அடுப்பில் ஏற்றி எண்ணெய் காய வைக்க வேண்டும்.எண்ணெய்க்கு மேலாக பூந்தி கரண்டியைப் பிடித்து ஒரு சிறு கரண்டியில் மாவை எடுத்து,பூந்தி கரண்டியில் ஊற்றி லேசாக தேய்க்க வேண்டும்.பூந்தி சிறுசிறு முத்துக்களாக எண்ணெயில் விழும்.பூந்தி சிவந்து போகுமுன் எடுத்து விட வேண்டும்.இவ்வாறு எல்லா மாவையும் பூந்தியாக போட்டு எடுத்து வைத்துக் கொள்ள வேண்டும்.
பாகு காய்ச்சும் விதம்:
ஒரு அடி கனமான பாதிரத்தில் சர்க்கரை எடுத்து அது மூழ்கும் அளவு (1 கப் சர்க்கரைக்கு 1/4 கப் தண்ணீர் போதும்) தண்ணீர் ஊற்றி அடுப்பில் ஏற்ற வேண்டும்.சிறிது நேரத்திலேயே சர்க்கரை கரைந்து தண்ணீர் கொதிக்க ஆரம்பிக்கும்.இந்த நேரத்தில் சிறிது கவனமுடன் இருந்து(பாகில் சிறிது கரண்டியில் எடுத்து ஆள் காட்டி விரலுக்கும் பெரு விரலுக்கும் இடையில் வைத்து 1,2,3 என எண்ணி விரல்களைப் பிரித்தால் இரண்டு விரல்களுக்கிடையே மெல்லிய கம்பியாக வரும்.இதுதான் இளம் கம்பிப் பாகு பதம்) இளம் கம்பி பாகு பதம் வந்ததும் அடுப்பில் இருந்து இறக்கி பூந்தியில் ஊற்றி நன்றாக கிளற வேண்டும்.கிளறுவதற்கு மத்தின் அடிப்பகுதியைப் பயன்படுத்தலாம்.அடுப்பில் ஒரு பாத்திரத்தை வைத்து அதில் நெய் ஊற்றிக் காய்ந்ததும் முதலில் முந்திரியைப் போட்டு பொன்னிறமாக வறுத்து,பிறகு திராட்சையை வறுத்து, இரண்டையும் பூந்தியில் கொட்டிக் கிளற வேண்டும். கிராம்பு,ஏலக்கய் பொடித்து போடவும்.குங்குமபூவையும் பூந்தியில் போட்டு நன்றாகக் கலக்கவும்.லேசாக சூடு இருக்கும்போதே உருண்டைகளாக அழுத்தி பிடித்து விடவும். சுவையான வீட்டிலேயே தயரிக்கப்பட்ட லட்டு தயார். சுமார் 15 உருண்டைகள் வரை கிடைக்கும்