அவியல்

பிடித்தமான எல்லா காய்களையும் அவியலுக்குப் பயன்படுத்தலாம்.அவியல் என்றாலே காய்களை நீளவாக்கில் நறுக்கிப்போட வேண்டும் என்பார்கள்.நானும் அவ்வாறே போட்டுவிடுவது.

வாழைக்காய்,உருளை, அவரை, காராமணி,மாங்காய், கத்தரிக்காய், முருங்கை,வெள்ளைப்பூசனி போன்றவற்றிலிருந்து கொஞ்சம்கொஞ்சமாக நறுக்கிச் சேர்த்துள்ளேன்.

காய்களை ரொம்பவே குழைய விடாமல் சரியான பதத்தில் வேகவிடவும். விருப்பமானால் மஞ்சள் தூள் சேர்க்கலாம். மாங்காய்,தயிர் சேர்ப்பதால் லேசான புளிப்புச்சுவையுடன் இருக்கும்.இவை இல்லாவிட்டால் சிறிது புளித்தண்ணீர் விடலாம்.

அவியலுக்கு தேங்காயெண்ணெய் விடுவாங்க.எனக்கு தேங்காயெண்ணெய் பழக்கமில்லையாதலால் (சமையலில்) நல்லெண்ணெய் சேர்த்திருக்கிறேன்.

தேவையானவை:

காய்கறிகள் நறுக்கியது_2 கப் அளவிற்கு
புளித்த‌ தயிர்_1/2 டம்ளர்
கறிவேப்பிலை_ஒரு கொத்து
எண்ணெய்_ஒரு டீஸ்பூன்
உப்பு_தேவைக்கு

அரைக்க:

தேங்காய்த்துண்டு_3
சீரகம்_1/2 டீஸ்பூன் அளவிற்கு
பச்சை மிளகாய்_2 (ஒன்று காரமானது,மற்றொன்று காரமில்லாதது)

செய்முறை:

காய்களை நன்றாகக் கழுவிவிட்டு விருப்பமான வடிவத்தில் நறுக்கவும். பொதுவாக‌ நீளவாக்கில்தான் நறுக்குவாங்க.

ஒரு கனமான பாத்திரத்தில் காய் வேகுமளவு மட்டும் தண்ணீர் எடுத்துக்கொண்டு அதில் காய்களைப்போட்டு சிறிது உப்பு போட்டு மூடி வேக வைக்கவும்.தீ மிதமாகவே இருக்கட்டும்.தண்ணீர் குறைவாக இருப்பதால் காய் தீய்ந்துபோக வாய்ப்புண்டு.வேகும்போதே இரண்டொருதரம் கிளறி விடவும்.

இதற்கிடையில் அரைக்கக் கொடுத்துள்ளவற்றைத் தண்ணீர் விடாமல் கெட்டியாக அரைத்துத் தயிருடன் கலந்து வைக்கவும்.

காய்கள் வெந்தபிறகு அரைத்து வைத்துள்ள தேங்காய்தயிர் விழுதைச் சேர்த்துக் கிளறி சிறிது கொதிக்கவிட்டு இறக்கவும். நீண்ட நேரம் கொதிக்க விட வேண்டாம்.

இறுதியாக எண்ணெயைக் காய்ச்சி விட்டு,கறிவேப்பிலையைப் போடவும்.

வறுவல்/பொரியல் இல் பதிவிடப்பட்டது . குறிச்சொற்கள்: , , , . 10 Comments »

அரைத்துவிட்ட சாம்பார்

மிளகாய்த்தூள் அரைக்கப் பயன்படுத்தும் அதே பொருள்களை வைத்து ஒரு நாள் சாம்பாருக்குத் தேவையானதை வறுத்துப் பொடித்து செய்கிறோம். அவ்வளவே. புதிதாக,வறுத்துப் பொடிக்கும்போது அதன் சுவையே தனிதான்.ஒரு காய் அல்லது பல காய்கள்,கிழங்குகள்,காய்ந்த பீன்ஸ் வகைகள் சேர்த்தும் செய்யலாம்.

தேவையானப் பொருள்கள்:

துவரம்பருப்பு_1/2 கப்
விருப்பமான காய்கறிகள்_தேவையான அளவு
சின்ன வெங்காயம்_10
தக்காளி_1
பூண்டிதழ்_2
புளி_கோலியளவு
உப்பு_தேவைக்கு
கொத்துமல்லி இலை

தாளிக்க:

எண்ணெய்
கடுகு
உளுந்து
சீரகம்
வெந்தயம்
பெருங்காயம்
கறிவேப்பிலை

வறுத்துப் பொடிக்க:

கொத்துமல்லி விதை_2 டேபிள்ஸ்பூன்
காய்ந்த மிளகாய்_2 (காரம் விரும்பினால் கூட ஒன்று சேர்த்துக்கொள்ளலாம்)
மிளகு_2
சீரகம்_1/2 டீஸ்பூன்
வெந்தயம்_சிறிது
கடலைப்பருப்பு_சிறிது
உளுந்து_சிறிது
கறிவேப்பிலை_சிறிது
தேங்காய்ப்பூ_ஒரு டீஸ்பூன்
மஞ்சள்_சிறுதுண்டு

செய்முறை:

துவரம் பருப்பில் சிறிது விளக்கெண்ணெய் விட்டு கூடவே பூண்டு,சிறிது மஞ்சள்தூள் சேர்த்து நன்றாக வேகவைத்துக்கொள்ளவும்.

வெறும் வாணலியை அடுப்பிலேற்றி வறுத்துப் பொடிக்க‌ வேண்டியவைகளை (மஞ்சள் தவிர) தனித்தனியே எண்ணெய் இல்லாமல் வறுத்துக்கொள்ளவும்.

ஆறியதும் மிக்ஸியில் போட்டு தூளாக,நைஸாக இடித்துக்கொள்ளலாம். அல்லது தண்ணீர் விட்டு அரைத்துக்கொள்ளவும்.

வெங்காயம்,தக்காளி,காய்கறிகள் இவற்றை விருப்பமான அளவில் நறுக்கிக்கொள்ளவும்.

புளி கரையும் அளவிற்கு தண்ணீர் விட்டு கரைத்து வைக்கவும்.

குழம்பு பாத்திரத்தை அடுப்பிலேற்றி எண்ணெய் விட்டுத் தாளிக்க வேண்டியவற்றைத் தாளிக்கவும்.

தாளிப்பு முடிந்ததும் வெங்காயம்,தக்காளி,காய்கறிகளை அடுத்தடுத்து சேர்த்து வதக்கி,பொடித்துவைத்துள்ள பொடியைச் சேர்த்துக் கிளறிவிட்டு,உப்பு சேர்த்து,பருப்பைக் கடைந்து ஊற்றி மூடி கொதிக்க வைக்கவும்.

உருளைக்கிழங்கு  போன்ற எளிதாக வேகக்கூடிய காய்களை சேர்ப்பதாக இருந்தால் சாம்பார் ஒரு கொதி வந்தபிறகு போடலாம். புரோக்கலி, கீரைவகைகள் போன்றவற்றை  சாம்பாரை இறக்குமுன் போட்டு ஒரு கொதி வந்ததும் இறக்கலாம். காய்ந்த பீன்ஸ் வகைகள் என்றால் முதல் நாளிரவே ஊறவைத்து,வேகவைத்து சேர்த்துவிடவும்.

சாம்பாரிலுள்ள காய்கள் வெந்ததும் புளித்தண்ணீரைச் சேர்த்து, கொதித்த பிறகு கொத்துமல்லை இலை சேர்த்து இறக்கவும்.

இது சாதம்,இட்லி,தோசை,பொங்கல் போன்றவற்றிற்கு மிகப் பொருத்தமாக இருக்கும்.

பிஸிபேளாபாத்

தேவையானவை:

அரிசி_ஒரு கப்
துவரம் பருப்பு_1/2 கப்
விருப்பமான காய்கறிகள்_2 கப் (நறுக்கியது)
(ப.பட்டாணி,பீன்ஸ்,கேரட்,உருளைக்கிழங்கு,முருங்கைக்காய்,கத்தரிக்காய்)
சின்ன வெங்காயம் _10
தக்காளி_1
புளி_கோலி அளவு
கொத்துமல்லி இலை_ஒரு கொத்து
எலுமிச்சை சாறு_ஒரு டீஸ்பூன்
உப்பு_தேவைக்கு

பிஸிபேலாபாத் பொடி தயாரிக்க:

கொத்துமல்லி விதை_2 டேபிள்ஸ்பூன்
காய்ந்த மிளகாய்_2
கடலைப் பருப்பு_ஒரு டீஸ்பூன்
வெந்தயம்_சிறிது
கஸகஸா_ஒரு டீஸ்பூன்
கிராம்பு_1
பட்டை_1
லவங்கம்_1
தேங்காய்ப் பூ_ஒரு டீஸ்பூன்

தாளிக்க:

எண்ணெய்
கடுகு
பெருங்காயம்
கறிவேப்பிலை

காரம்,மசாலா வாசனை அதிகம் வேண்டுமானால் கொஞ்சம் கூடுதலாக சேர்த்துக்கொள்ளலாம்.

செய்முறை:

வெறும் வாணலியில் துவரம் பருப்பைப் போட்டு சிவக்க வறுத்துக்கொள்ளவும்.துவரம் பருப்பை வறுத்து செய்யும்போது நல்ல வாசனையாக இருக்கும்.

அரிசியில் புழுங்கலரிசியை எடுத்துக்கொள்வது நல்லது.நின்று வேகும்.

ஒரு குக்கரில் அரிசி,பருப்பு இரண்டையும் ஒன்றாகப் போட்டுக் கழுவிவிட்டு எப்போதும் சாதத்திற்கு  வைக்கும் தண்ணீரை விட கொஞ்சம் கூடுதலாக விட்டு,சிறிது மஞ்சள்தூள்,சிறிது உப்பு சேர்த்து வேகவைத்துக்கொள்ளவும். பருப்பிற்கும் சேர்த்து தண்ணீர் ஊற்ற வேண்டும்.

சாதம் வெந்துகொண்டிருக்கும்போதே பொடியைத் தயார் செய்துகொள்ளலாம்.

வெறும் வாணலியில் வறுத்துப் பொடிக்க வேண்டியவற்றைத் தனித்தனியாக வறுத்து,ஆறியதும் பொடித்து வைத்துக்கொள்ளவும்.

புளியை கரைத்து வைத்துக்கொள்ளவும்.

காய்கறிகளை விருப்பமான வடிவத்தில் நறுக்கி வைக்கவும்.

ஒரு வாணலில் எண்ணெய் விட்டு தாளிக்க வேண்டியதைத் தாளித்துவிட்டு, வெங்காயம்,தக்காளி,காய்கறிகள் இவற்றை அடுத்தடுத்து சேர்த்து வதக்கவும்.

இவை நன்றாக வதங்கியதும் புளித்தண்ணீர்,சிறிது உப்பு சேர்த்து,காய்கள் மூழ்கும் அளவு தண்ணீர் ஊற்றி காய் வெந்து வரும்வரை மூடி கொதிக்கவைக்கவும்.ஏற்கனவே சாதத்தில் உப்பு சேர்த்திருப்பதால்  கொஞ்சமாக சேர்த்துக்கொள்ளவும்.

காய் வெந்ததும் பொடித்து வைத்துள்ளப் பொடியைப்போட்டுக் கலந்துவிட்டு ஒரு கொதி வரும்வரை மூடி வைக்கவும்.

இப்போது காய்கறி கலவையை எடுத்து வெந்த பருப்புசாதத்தில் கொட்டிக் கிளறி சிறிது நேரம் அடுப்பில் வைத்து எலுமிச்சை சாறு விட்டு, கொத்துமல்லி இலை தூவி இறக்கவும்.

இதற்கு உருளைக்கிழங்கு,மசால் வடை,அப்பளம்,வத்தல் என எல்லாமே நன்றாக இருக்கும்.

குறிப்பு:

பொடி செய்ய முடியவில்லையெனில் சாம்பாருக்குப்போடும் மிளகாய்த்தூளையேப் பயன்படுத்திக் கொள்ளலாம் . தாளிக்கும்போது மட்டும் கிராம்பு,பட்டை,லவங்கம் சேர்த்து  தாளித்துக்கொள்ளலாம்.

பாஸ்தா (மற்றொரு முறை)


தேவையானப் பொருள்கள்:

விருப்பமான பாஸ்தா_2 கப்
விருப்பமான பாஸ்தா சாஸ்_3 டீஸ்பூன் அல்லது தேவைக்கேற்ப‌ (தக்காளி,பூண்டு,பேஸில் உள்ளது)
டோஃபு_1/4 பாகம்
விருப்பமான குடை மிளகாய்_பாதி
பச்சைப் பட்டாணி_1/2 கைப்பிடி
சின்னவெங்காயம்_2
மிளகாய்த்தூள்_ஒரு டீஸ்பூன்
மஞ்சள் தூள்_சிறிது
கொத்துமல்லி இலை_ஒரு கொத்து
உப்பு_தேவைக்கு

தாளிக்க:

ஆலிவ் ஆயில்_2 டீஸ்பூன்
சீரகம்

செய்முறை:

கீழேயுள்ள செய்முறையை பாஸ்தா வெந்துகொண்டிருக்கும்போதே செய்துகொள்ளவும்.

டோஃபுவில் உள்ள தண்ணீரை வடித்துவிட்டு விருப்பமான வடிவத்தில் நறுக்கி ஒரு நான்ஸ்டிக் பேனில் சிறிது ஆலிவ் ஆயில் விட்டு சூடேறியதும் டோஃபுவைப் போட்டு சிறிது மிளகாய்த்தூள்,உப்பு தூவி ஃப்ரை செய்து வைக்கவும்.

வெங்காயம் நறுக்கி வைக்கவும்.மிளகாயையும் ஏதாவதொரு வடிவத்தில் நறுக்கிக்கொள்ளவும்.

ஒரு நான்ஸ்டிக் பேனை அடுப்பில் ஏற்றி,எண்ணெய் விட்டு சீரகம் தாளித்துவிட்டு,வெங்காயம் சேர்த்து வதக்கவும்.

அது வதங்கியதும் மிளகாய்,பட்டாணி சேர்த்து வதக்கவும்.இவை வதங்கும்போதே மிளகாய்த்தூள்,மஞ்சள்தூள்,உப்பு சேர்த்து வதக்கவும்.

இவை வதங்கியதும் பாஸ்தா சாஸ் சேர்த்துக் கிளறிவிடவும்.இதில் உள்ள காய்கள் வேக,வெந்துகொண்டிருக்கும் பாஸ்தாவிலிருந்து இரண்டு அல்லது மூன்று கரண்டி தண்ணீரை எடுத்து ஊற்றவும்.

காய் வெந்து,ஓரளவு தண்ணீர் வற்றியதும் டோஃபுவை சேர்த்துக் கிளறி,அடுப்பை நிறுத்திவிட்டு,வெந்த பாஸ்தாவைக் கொட்டிக்கிளறி, கொத்துமல்லி தூவி இறக்கவும்.

கீழே உள்ளதில் கேரட்,பீன்ஸ்,பட்டாணி,பச்சை குடைமிளகாய் சேர்த்துள்ளேன்.

வெஜிடபிள் பிரியானி/ Vegetable briyani

தேவையானப் பொருள்கள்:

பாசுமதி அரிசி_2 கப்
விருப்பமான காய்கள்_2 கப் (நறுக்கியது)
(இதில் நான் சேர்த்திருப்பது கேரட்,பீன்ஸ்,பச்சைப் பட்டாணி,டோஃபு_1/3 பாகம் (விருப்பமானால்),வெங்காயத் தாள் முதலியவை.)
பெரிய சிவப்பு வெங்காயம்_பாதி
இஞ்சி_ஒரு துண்டு
பூண்டு_3 பற்கள்
மிளகாய்த் தூள்_2 டீஸ்பூன்
உப்பு_தேவைக்கு
தேங்காய்_1/4 மூடி
தயிர்_2 டீஸ்பூன்
எலுமிச்சை சாறு_2 டீஸ்பூன்
கொத்துமல்லி இலை_2 கொத்து
புதினா_2 கொத்து

அரைக்க:

சின்ன வெங்காயம்_5 லிருந்து 7
தக்காளி_1
பச்சை மிளகாய்_1(காரம் விரும்பினால்)

தாளிக்க:

நெய்(அ)விருப்பமான எண்ணெய்_2 டீஸ்பூன்
கிராம்பு_3
பிரிஞ்சி இலை_2
சீரகம்_1/2 டீஸ்பூன்
பெருஞ்சீரகம்_1/2 டீஸ்பூன்
முந்திரி_10
ஏலக்காய்_1

செய்முறை:

பிரியானி தயார் செய்வதற்கு 1/2 மணி நேரம் முன்னதாக அரிசியைத் தண்ணீரில் ஒரு 10 நிமிடத்திற்கு ஊற வைக்கவும். பிறகு தண்ணீரை வடித்து விடவும்.ஒரு வாணலியில் ஒரு டீஸ்பூன் அளவிற்கு நெய் ஊற்றி சூடேறியதும் அரிசியைப் போட்டு வதக்க வேண்டும்.அது நிறம் மாறும் சமயம் அடுப்பை நிறுத்தி விடவும்.(இந்த வேலையை பிரியானி செய்யும் போதுதான் செய்ய வேண்டுமென்பதில்லை.முதல் நாளே கூட நேரம் கிடைக்கும் போது தயார் செய்துகொள்ளலாம்.) அரிசி சூடு ஆறியதும் சமைக்கப் போகும் எலக்ட்ரிக் குக்கரில் கொட்டி வைக்கவும்.

பச்சைப் பட்டானியை முதல் நாளே ஊற வைத்துக்கொள்ளவும்.தேங்காயைத் துருவி மிக்ஸியில் அரைத்து பால் எடுத்துக்கொள்ளவும். காய்களை விருப்பமான வடிவத்தில் நறுக்கி வைக்கவும்.வெங்காயத்தை நீள வாக்கில் நறுக்கி வைக்கவும்.இஞ்சி,பூண்டு தட்டி வைக்கவும்.

அரைக்கக் கொடுத்துள்ளவற்றை அரைத்து எடுத்துக்கொள்ளவும்.மைய அரைக்க வேண்டுமென்பதில்லை.

Tofu வை  fry செய்யும் விதம்:

Tofu வில் 1/3 பங்கை தண்ணீர் வடிய வைத்துவிட்டு சிறுசிறு சதுரங்களாக நறுக்கி வைக்கவும்.ஒரு நான்ஸ்டிக் பேனில் சிறிது ஆலிவ் ஆயில் ஊற்றி சூடேறியதும் டோஃபுவைப் போட்டு சொடசொடப்பு அடங்கியதும் மிள்காய்த்தூள்,உப்பு தூவி சிறிது நேரம் மூடி வைக்கவும்.இவை நன்றாகக் கலந்து மிளகாய்த் தூள் வாசனை போனதும் அடுப்பை நிறுத்தி விடவும்.

ஒரு கடாயில் நெய் எடுத்துக் கொண்டு சூடேறியதும் தாளிக்கக் கொடுத்துள்ளவற்றை ஒன்றன் பின் ஒன்றாகத் தாளித்த பிறகு வெங்காயம், இஞ்சிபூண்டு,காய்கள் இவற்றை அடுத்தடுத்து சேர்த்து வதக்கவும்.நன்றாக வதங்கியதும் அரைத்து வைத்துள்ள வெங்காயம்,தக்காளி கலவையை சேர்த்து வதக்கவும்.அடுத்து மிளகாய்த் தூள்,உப்பு சேர்த்து வதக்கி ஒன்றுக்கு இரண்டு என தண்ணீர் (தேங்காய்ப் பாலையும் சேர்த்து) ஊற்றி மூடி கொதிக்க விடவும்.கொதி வந்ததும் கடாயில் உள்ளவற்றை அப்படியே எடுத்து குக்கரில் கொட்டி,தயிர் சேர்த்துக் கிளறி புதினா,கொத்துமல்லி ,(விருப்பமானால்  tofu  வையும்) தூவி மூடி  switch on  செய்யவும்.

ஒரு பத்து நிமிடடம் கழித்து    switch off   செய்துவிட்டு எலுமிச்சை சாறு சேர்த்து ஒருமுறை கீழிருந்து மேலாக‌ லேசாகக் கிளறிவிட்டு மூடி மீண்டும்  switch on செய்யவும்.அப்போதுதான் அடியில் ஒரு லேயர் மாதிரி படியாமல் இருக்கும்.அதன் பிறகு ஒரு 5 லிருந்து 10 நிமிடத்தில் குக்கர்   warm mode   க்கு சென்றுவிடும்.பிறகென்ன!சுவையான வெஜிடபிள் பிரியானியை எடுத்து சாப்பிட வேண்டியதுதான்.

இதனை வெங்காயம் தயிர் பச்சடியுடன் சாப்பிட சுவையாக இருக்கும்.