கேரட் & புரோக்கலி பொரியல் / Carrot & Broccoli poriyal

carrot&broccoli poriyal

தேவையானவை:

நடுத்தர அளவிளான புரோக்கலி_1
கேரட்_1
சின்ன வெங்காயம்_இரண்டு அல்லது மூன்று
பச்சை மிளகாய்_ஒன்றிரண்டு
வெந்து பிழியப்பட்ட‌ துவரம் பருப்பு_ ஒரு டேபிள்ஸ்பூன்
துருவிய தேங்காய்_ஒரு டேபிள்ஸ்பூன்
கொத்துமல்லி இலை_கொஞ்சம்

தாளிக்க:

எண்ணெய்
கடுகு
உளுந்து
சீரகம்
கடலைப் பருப்பு
பெருங்காயம்
கறிவேப்பிலை

செய்முறை:

சாம்பாருக்கு வேகவைத்த‌ துவரம் பருப்பில் ஒரு டேபிள்ஸ்பூன் அளவிற்கு கொஞ்சம் பிழிந்து வைத்துக்கொள்ளவும்.

கேரட்,புரோக்கலி இரண்டையும் நன்றாகக் கழுவிவிட்டு சிறுசிறு துண்டுகளாக நறுக்கிக்கொள்ளவும்.

சின்ன வெங்காயத்தையும் அவ்வாறே நறுக்கவும்.பச்சை மிளகாயைக் கீறிக்கொள்ளவும்.காரம் விரும்பினால் பொடியாக்கலாம்.

வாணலை அடுப்பிலேற்றி எண்ணெய் விட்டு காய்ந்ததும் தாளிக்க வேண்டியவற்றைத் தாளித்துவிட்டு,வெங்காயம்,பச்சை மிளகாய் சேர்த்து வதக்கவும்.

இவை வதங்கியதும் நறுக்கி வைத்துள்ள கேரட்,புரோக்கலியைச் சேர்த்து ஒரு வதக்கு வதக்கி,லேஸாக உப்பு தூவி,சிறிது தண்ணீர் தெளித்து மூடி மிதமானத் தீயில் வேக வைக்கவும்.

புரோக்கலி சீக்கிரமே வெந்துவிடும்.கேரட்டும்கூட மெல்லிய துண்டுகளாக இருப்பதால் சீக்கிரமே வெந்துவிடும்.

இவை வெந்ததும் பிழிந்து வைத்துள்ள பருப்பை சேர்த்துக் கிளறிவிட்டு சூடேறியதும்,தேங்காய்ப்பூ,கொத்துமல்லி இலை தூவி மேலும் ஒரு கிளறுகிளறி இறக்கவும்.இப்போது எளிதாக செய்யக்கூடிய கேரட் & புரோக்கலி பொரியல் தயார்.

இது எல்லா சாதத்திற்கும் நன்றாக இருக்கும்.

வறுவல்/பொரியல் இல் பதிவிடப்பட்டது . குறிச்சொற்கள்: , , , , , , . 9 Comments »

கேரட் & பீன்ஸ் பொரியல்

தேவையானப் பொருள்கள்:

பச்சைப் பயறு_ 1/2 கைப்பிடி
கேரட் _ 1 (சிறியது)
பீன்ஸ்_ ஏறக்குறைய 20 (எண்ணிக்கையில்)
சின்ன வெங்காயம்_2
பச்சைமிளகாய்_ 1 (விருப்பமானால்)
மிளகாய்த்தூள்_ 1/2 டீஸ்பூன்
மஞ்சள் தூள்_சிறிது
தேங்காய்ப் பூ_ஒரு டீஸ்பூன் (விருப்பமானால்)
கொத்துமல்லி இலை_ஒரு கொத்து
உப்பு_தேவைக்கு

தாளிக்க:

நல்லெண்ணெய்
கடுகு
உளுந்து
சீரகம்
கடலைப்பருப்பு
பெருங்காயம்
கறிவேப்பிலை

செய்முறை:

பாசிப்பருப்பை நன்றாகக் கழுவிவிட்டு, ஒரு வாணலியில் போட்டு அது வேகும் அளவை விட சிறிது கூடுதலாக தண்ணீர் விட்டு அடுப்பில் ஏற்றவும்.சிறிது மஞ்சள்தூள்,பெருங்காயம் சேர்த்து மூடி வேக வைக்கவும்.

வெங்காயம்,பச்சைமிளகாய்,கேரட்,பீன்ஸ் இவற்றை விருப்பமான வடிவத்தில் நறுக்கி வைக்கவும்.

பருப்பு பாதி வெந்தபிறகு நறுக்கி வைத்துள்ள காய்களை அதனுடன் சேர்த்து,தேவையான உப்பும் சேர்த்து வேக வைக்கவும்.

மூடி போட வேண்டாம்.போட்டால் பீன்ஸின் பச்சை நிறம் மாறிவிடும்.

காய்கள் வெந்துகொண்டிருக்கும்போதே மிளகாய்த்தூளை சேர்த்துக் கிளறி விடவும்.

காய்கள் வெந்து,நீர் வற்றியதும் தேங்காய்ப் பூ,கொத்துமல்லி இலை சேர்த்துக் கிளறிவிட்டு இறக்கவும்.

இப்போது ஒரு தாளிக்கும் கரண்டியில் சிறிது எண்ணெய் விட்டுக் காய்ந்ததும் தாளிக்க வேண்டியவற்றைத் தாளித்துப் பொரியலில் கொட்டிக்கிளறவும்.

இப்போது அருமையான கேரட்,பீன்ஸ் பொரியல் தயார்.

குறிப்பு:

இந்தக் காய்களில்தான் செய்ய வேன்டுமென்பதில்லை.இதனை விருப்பமான எல்லாக் காய்களிலும் செய்யலாம்.

கேரட் & முட்டை பொரியல்

தேவையானப் பொருள்கள்:

கேரட்_1
சின்ன வெங்காயம்_2
பச்சை மிளகாய்_1
மஞ்சள் தூள்_சிறிது
முட்டை_1
உப்பு_தேவைக்கு

தாளிக்க:

எண்ணெய்
கடுகு
உளுந்து
சீரகம்
கடலை பருப்பு
கறிவேப்பிலை

செய்முறை:

கேரட் பொரியலில் கேரட் வெந்ததும் தேங்காய்ப்பூ அல்லது வெந்த பருப்பு சேர்ப்போம்.அதற்கு பதிலாக இதில் முட்டையை ஊற்றி செய்கிறோம். அவ்வளவே.

வெங்காயம்,பச்சை மிளகாய் இவற்றைப் பொடியாக நறுக்கி வைக்கவும். கேரட்டை கேரட் துருவியில் துருவிக்கொள்ளவும்.

ஒரு கடாயை அடுப்பில் வைத்து எண்ணெய் ஊற்றி சூடாக்கித் தாளிக்கக் கொடுத்துள்ளப் பொருள்களை ஒன்றன் பின் ஒன்றாகத்   தாளித்துவிட்டு  வெங்காயம்,பச்சை மிளகாய் சேர்த்து வதக்கவும்.

பிறகு கேரட்,உப்பு,மஞ்சள் தூள் சேர்த்து வதக்கவும்.

கேரட் வதங்கியதும் அதில் முட்டையை உடைத்து ஊற்றிக் கிளறிவிடவும்.

இரண்டும் சேர்ந்தார்போல் வந்ததும் இறக்கவும்.

இது எல்லா வகையான சாதத்திற்கும் நன்றாக இருக்கும்.

கேரட்,பீன்ஸ்,உருளைக்கிழங்கு பொரியல்

தேவையானப் பொருள்கள்:

கேரட்_பாதி
பீன்ஸ்_10
உருளைக்கிழங்கு_1
சின்ன வெங்காயம்_2
மிளகாய்த்தூள்_1/2 டீஸ்பூன்
மஞ்சள் தூள்_சிறிது
தேங்காய்ப்பூ_ஒரு டீஸ்பூன்
வேக வைத்து பிழிந்த துவரம் பருப்பு_கொஞ்சம் (இல்லையென்றால் பரவாயில்லை)
கொத்துமல்லி இலை_ஒருகொத்து
உப்பு_தேவைக்கு

தாளிக்க:

நல்லெண்ணெய்
கடுகு
உளுந்து
சீரகம்
கடலைப்பருப்பு
பெருங்காயம்
கறிவேப்பிலை

செய்முறை:

காய்களைக் கழுவிவிட்டு அவற்றை விருப்பமான வடிவத்தில் நறுக்கி வைக்கவும்.வெங்காயத்தைப் பொடியாக நறுக்கி வைக்கவும்.

ஒரு வாணலியை அடுப்பில் ஏற்றி எண்ணெய் விட்டுக் காய்ந்ததும் தாளிக்கக் கொடுத்துள்ளப் பொருள்களை ஒன்றன்பின் ஒன்றாகத் தாளிக்கவும்.

தாளித்து முடித்ததும் வெங்காயம் சேர்த்து வதக்கி காய்களைச் சேர்த்து வதக்கவும்.

இவை வதங்கும்போதே மிளகாய்த்தூள்,மஞ்சள்தூள்,உப்பு சேர்த்து பிரட்டிவிட்டு காய் வேகும் அளவு தண்ணீர் விட்டு மூடி வேக வைக்கவும்.

சில உருளைக்கிழங்குகள் சீக்கிரமே வெந்துவிடும்.அவற்றை கேரட்&பீன்ஸ் பாதி வெந்த நிலையில் சேர்த்துக் கிளறிவிடவும்.

எல்லாம் நன்றாக வெந்தபிறகு வெந்த பருப்பு சேர்த்துக் கிளறிவிட்டுக் கலந்ததும் தேங்காய்ப்பூ,கொத்துமல்லி தூவி இறக்கவும்.

இது எல்லா வகையான சாதத்திற்கும் பொருத்தமாக இருக்கும்.

கேரட் பொரியல்

தேவையானப் பொருள்கள்:

கேரட்_2
சின்ன வெங்காயம்_2
பச்சை மிளகாய்_1
மஞ்சள் தூள்_சிறிது
வேக வைத்த பச்சைப் பருப்பு (அ துவரம்பருப்பு_1/2 கைப்பிடி
தேங்காய்ப் பூ_ஒரு டீஸ்பூன்
கொத்துமல்லி இலை_ஒரு கொத்து
உப்பு_தேவைக்கு

தாளிக்க:

எண்ணெய்_1/2 டீஸ்பூன்
கடுகு
உளுந்து
சீரகம்
கடலை பருப்பு
பெருங்காயம்
கறிவேப்பிலை

செய்முறை:

கேரட்டைக் கழுவித் துடைத்து வைக்கவும்.

வெங்காயம்,பச்சை மிளகாய் இவற்றைப் பொடியாக நறுக்கி வைக்கவும்.வேக வைத்த பருப்பைப் பிழிந்து வைக்கவும். கேரட்டை கேரட் துருவியில் துருவிக்கொள்ளவும். (அடுப்பில் கடாயை வைத்த பிறகே துருவிக் கொள்ளலாம். முதலிலேயே துருவி வைத்தால் கேரட்டின் நிறம் மாறிவிடும்.)

ஒரு கடாயை அடுப்பில் வைத்து எண்ணெய் ஊற்றி சூடாக்கித் தாளிக்கக் கொடுத்துள்ளப் பொருள்களை ஒன்றன் பின் ஒன்றாகத்   தாளித்து, வெங்காயம், பச்சை மிளகாய் சேர்த்து வதக்கவும். பிறகு மஞ்சள் தூள், கேரட்,உப்பு சேர்த்து வதக்கி மிதமானத் தீயில் மூடி போட்டு வேக விடவும். தண்ணீர் ஊற்ற வேண்டாம்.காயில் உள்ள தண்ணீரே போதுமானது.வெந்து, பச்சை வாசனை போனதும் பருப்பு,தேங்காய்ப் பூ,கொத்துமல்லி தூவிக் கிளறி இறக்கவும்.

இது எளிமையான,விரைவில் செய்யக் கூடிய ,சுவையான,சத்தான பொரியலாகும்.இது எல்லா சாதத்திற்கும் பொருத்தமாக இருக்கும்.

இதில் பருப்பு சேர்ப்பதற்கு பதில் ஒரு முட்டையை உடைத்து ஊற்றிக் கிளறி முட்டை வெந்ததும் இறக்கலாம்.இதுவும் சுவையாக இருக்கும்.

வறுவல்/பொரியல் இல் பதிவிடப்பட்டது . குறிச்சொற்கள்: , , , , . Leave a Comment »

காய்கறி சாதம் (Vegetable fried rice)

தேவையானவை:

பாசுமதி அரிசி_2 கப்
காய்கறி_2 கப் நறுக்கியது (விருப்பமான காய்கறிகள்)
(கேரட்,பீன்ஸ்,பச்சைப் பட்டானி,பச்சை குட மிளகாய்,சிவப்பு குட மிளகாய்)
சின்ன வெங்காயம்_5
இஞ்சி_ஒரு சிறிய துண்டு
பூண்டு_3 பற்கள்
பச்சை மிளகாய்_1
தக்காளி_கால் பாகம்(விருப்பமானால்)
மிளகாய்த் தூள்_1 டீஸ்பூன்
மஞ்சள் தூள்_1/2 டீஸ்பூன்
உப்பு_தேவையான அளவு
எலுமிச்சை சாறு_1 டீஸ்பூன்
தேங்காய்ப்பால்_1 டேபிள்ஸ்பூன்
கொத்துமல்லி இலை_1 கொத்து

தாளிக்க:

ஆலிவ் ஆயில் (அ) நல்லெண்ணெய்_2 டீஸ்பூன்
சீரகம்
பெருஞ்சீரகம்
முந்திரி_5
உலர் திராட்சை_10

செய்முறை:

முதலில் அரிசியை முக்கால் பதத்திற்கு சிறிது உப்பு போட்டு வேக வைத்து வடித்து ஆற வைக்கவும்.சாதம் உதிர் உதிராக இருக்கட்டும்.காய்கறிகளை விருப்பமான வடிவத்தில் நறுக்கிக்கொள்ளவும்.பச்சைப் பட்டானியை (1/2 கைப்பிடி)முதல் நாளிரவே ஊற வைத்து விடவும்.வெங்காயம்,தக்காளியைப் பொடியாக நறுக்கி வைக்கவும்.இஞ்சி,பூண்டைத் தட்டி வைக்கவும்.

ஒரு கடாயில் எண்ணெய் ஊற்றி சூடேற்றவும்.அதில் தாளிக்க உள்ளப் பொருள்களைத் தாளித்து வெங்காயம்,பச்சை மிளகாய் சேர்த்து வதக்கவும். அடுத்து இஞ்சி,பூண்டு சேர்த்து வதக்கவும்.அடுத்து காய்கறிகளைச் சேர்த்து வதக்கவும்.மேலும் த‌க்காளியைச் சேர்த்து வதக்கவும்.இவை நன்றாக வதங்கியதும் மிளகாய்த்தூள்,மஞ்சள் தூள்,உப்பு சேர்த்து வத்க்கி தேங்காய்ப் பால் சேர்த்துக் கிளறி மேலும் காய்கறிகள் வேக சிறிது தண்னீர் தெளித்து மூடி மிதமானத் தீயில் வேக விடவும்.எல்லாம் ஒன்றாகக் கலந்து வெந்த பிறகு சாதத்தைக் கொட்டிக் கிளறி சிறிது நேரம் மூடி வைக்கவும்.சாதம் காய்கறி மசாலாவுடன் நன்றாகக் கலந்த பிறகு எலுமிச்சை சாறு கலந்து,கொத்துமல்லி தூவி இறக்கவும்.

இந்த சாதத்திற்கு எல்லா வறுவலும் நன்றாகப் பொருந்தும்.வெங்காயப் பச்சடியும் சூப்பர் காம்பினேஷன்.

கேரட் சாதம்

தேவையானப் பொருள்கள்:

பச்சரிசி (அ) புழுங்கல் அரிசி_1 கப்
கேரட்_பாதி
இஞ்சி_ஒரு மிகச்சிறிய துண்டு
பச்சை மிளகாய்_1
சின்ன வெங்காயம்_1
மிளகாய்த்தூள்_1/2 டீஸ்பூன்
மஞ்சள் தூள்_1/4 டீச்பூன்
தேங்காய்ப் பால்_1 டேபிள்ஸ்பூன்
எலுமிச்சை சாறு_1/2 டீஸ்பூன்
கொத்துமல்லி இலை_ஒரு கொத்து
உப்பு_ தேவையான அளவு

தாளிக்க:

நல்லெண்ணெய்_2 டீஸ்பூன்
சீரகம்_1/4 டீஸ்பூன்
முந்திரி_2
கடலைப் பருப்பு_1 டீஸ்பூன்
வேர்க்கடலை_2 டீஸ்பூன்
காய்ந்த மிளகாய்_1
கறிவேப்பிலை_5 இலைகள்
பெருங்காயம்_சிறிது

செய்முறை:

முதலில் அரிசியை நன்றாக வேக வைத்து வடித்து உதிர் உதிராக ஆற வைத்துக்  கொள்ளவும். சின்ன வெங்காயத்தைப் பொடியாகவும்,பச்சை மிளகாயை இரண்டாகவும்(அ)காரம் விரும்பினால் பொடியாகவும்,இஞ்சியைப் பொடியாகவும் நறுக்கிக்கொள்ளாவும்.கேரட் துருவியில் கேரட்டைத் துருவிக்கொள்ளவும்.

ஒரு வாணலியை அடுப்பில் ஏற்றி எண்ணெய் ஊற்றிக் காய்ந்ததும் தாளிக்கக் கொடுத்துள்ளப் பொருள்களை ஒன்றன்பின் ஒன்றாகத் தாளிக்கவும்.அடுத்து இஞ்சி,பச்சை மிளகாயை ஒரு வதக்கு வதக்கி பிறகு வெங்காயம் சேர்த்து வதக்கவும்.பிறகு கேரட் சேர்த்து நன்றாக வதக்கவும்.அடுத்து மிளகாய்த்தூள், மஞ்சள் தூள் சேர்த்து வதக்கி,தேங்காய்ப்பால்,உப்பு  சேர்த்துக் கிளறி விடவும். இதில் ஆறிய சாதத்தைப் போட்டுக் கிளறி எலுமிச்சை சாறு,கொத்துமல்லி இலை சேர்த்து நன்றாகக் கிளறி இறக்கவும்.

இதற்கு veg, nonveg வறுவல்கள் அனைத்துமே நன்றாகப் பொருந்தும்.

குறிப்பு:

இதற்கென சாதம் தனியாக வடித்துத்தான் செய்ய வேண்டுமென்பதில்லை.மீதமான சாதத்திலும் செய்யலாம்.

சாதம் இல் பதிவிடப்பட்டது . குறிச்சொற்கள்: , , , , , . Leave a Comment »

காய்கறி குருமா

 

தேவை:

விருப்பமான காய்கறிகள்_2 கப்

(கேரட்,பீன்ஸ்,காலிஃப்ளவர்,உருளை கிழங்கு,சௌசௌ,வெள்ளை பூசணி,வெங்காயத்தாள்,முருங்கைக்காய்,கத்தரிக்காய் போன்றவை.இவற்றில் ஒரு காயோ அல்லது பல காய்கள் சேர்த்தோ செய்யலாம்.இதில் குறிப்பிட்டுள்ளதைத்தான் சேர்க்க வேண்டும் என்பதில்லை.உங்கள் விருப்பப்படி சேர்க்கலாம்)

பச்சை பட்டாணி_1/4 கப்

சின்ன வெங்காயம்_10

தக்காளி_2

பச்சை மிளகாய்_1

இஞ்சி_1 துண்டு

பூண்டு_2 பற்கள்

மிளகாய் தூள்_2 டீஸ்பூன்

மஞ்சள் தூள்_1/2 டீஸ்பூன்

கொத்துமல்லி இலை_2 கொத்து

அரைக்க:

தேங்காய்_3 துண்டுகள்

கசகசா_1 டீஸ்பூன்

தாளிக்க:

சீரகம்_1/2 டீஸ்பூன்

பெருஞ்சீரகம்_1/2 டீஸ்பூன்

பிரிஞ்சி இலை_1

முந்திரி_5

எண்ணெய்_2 டீஸ்பூன்

செய்முறை:

பச்சை பட்டாணி சேர்ப்பதாக இருந்தால் முதல் நாள் இரவே ஊற வைத்து விட வேண்டும்.கசகசாவை மிதமான சூட்டில் வறுத்து சிறிது வெந்நீர் ஊற்றி ஊறவைக்கவும்.காய்களை விரும்பிய வடிவத்தில் நறுக்கவும்.இஞசி,பூண்டு நசுக்கி வைக்கவும்.வெங்காயம்,தக்காளி,பச்சை மிளகாய் பொடியாக நறுக்கவும்.

ஒரு வாணலியில் எண்ணெய் ஊற்றி தாளிக்க கொடுத்துள்ள பொருள்களை ஒன்றன் பின் ஒன்றாக தாளித்து பிறகு வெங்காயம் சேர்த்து வதக்கவும்.பிறகு இஞ்சி,பூண்டு வதக்கி அடுத்து தக்காளி சேர்த்து நன்றாக வதக்கிய பிறகு காய்கறிகளை வதக்கவும்.பட்டாணி நன்றாக ஊறி இருந்தால் காய்களுடன் அப்படியே சேர்க்கலாம்.இல்லை என்றால் தனியாக வேகவைத்து சேர்க்கலாம்.இப்போது மிளகாய் தூள்,மஞ்சள் தூள் சேர்த்து வதக்கி காய் வேகுமளவு தண்ணீர் ஊற்றி உப்பு,காரம் சரிபார்த்து வேகவிடவும்.

காய் வெந்ததும் கசகசா,தேங்காய் அரைத்து ஊற்றவும்.குருமா கெட்டியாக இருக்கட்டும்.இரண்டு கொதி கொதித்ததும் எலுமிச்சை சாறு ஊற்றி, கொத்துமல்லி இலை தூவி இறக்கவும்.புதினா வாசம் பிடிக்குமானால் இரண்டு(அ)மூன்று இலைகள் சேர்க்கலாம்.இப்போது கமகமக்கும் காய்கறி குருமா தயார்.இது சப்பாத்தி,நாண்,இடியாப்பம் இவற்றிற்கு நன்றாகப் பொருந்தும்.

கேரட்,கத்தரிக்காய்,முருங்கைக்காய் சாம்பார்

 

தேவையான பொருள்கள்:
துவரம் பருப்பு: 1/2 கப்
கேரட்_1
கத்தரிக்காய்_1
முருங்கைக்காய்_1
சின்ன வெங்காயம்_5
தக்காளி_1
பூண்டு_ 2 பற்கள்
புளி_பெரிய கோலிக்குண்டு அளவு
மிளகாய் தூள்_ 21/2 டீஸ்பூன்
மஞள் தூள்_  1/4 டீஸ்பூன்
கொத்துமல்லி தழை_ 1 கொத்து
தாளிக்க:

கடுகு_ 1/4 டீஸ்பூன்
உளுந்து_ 1/4 டீஸ்பூன்
சீரகம்_ 1/4 டீஸ்பூன்
வெந்தயம்_  சிறிது
பெருங்காயம்_சிறிது
காய்ந்த மிளகாய்_1
கறிவேப்பிலை_ 1/2 ஈர்க்கு

செய்முறை:
முதலில் பருப்பை நன்றாக கழுவி நீரை வடித்துவிட்டு அது மூழ்கும் அளவை விட அதிகமாகவே தண்ணீர் ஊற்றி அதில் மஞ்சள் தூள்,  2 சொட்டு விளக்கெண்ணெய் (அ) நல்லெண்ணெய் சேர்த்து பருப்பு குழையும் வரை வேக வைக்கவும். காய்களை விருப்பமான வடிவத்தில் நறுக்கிக் கொள்ளவும்.இதில் உள்ள காய்களைத்தான் போடவேண்டும் என்பதில்லை.பிடித்தமான காய்களை போட்டுக்கொள்ளலாம். வெங்காயத்தை நீள வாக்கில் அரிந்து வைக்கவும்.பூண்டு உரித்து வைக்கவும்.தக்காளியைத் துண்டுகளாக்கவும்.புளியை நீரில் ஊறவத்து  1/2 கப் அளவிற்கு கரைத்து வைக்கவும்.
பாத்திரத்தை அடுப்பில் ஏற்றி எண்ணெய் விட்டு சூடாகியதும் கடுகு,உளுந்து, சீரகம்,வெந்தயம்,பெருங்காயம்,காய்ந்த மிளகாய்,கறிவேப்பிலை ஆகியவற்றை ஒன்றன் பின் ஒன்றாக தாளித்து பிறகு வெங்காயம் சேர்த்து வதக்கவும்.அடுத்து தக்காளி வதக்கி அதன்பிறகு காய்களை வதக்க வேண்டும்.சிறிது வதங்கியதும் மிள்காய்த் தூள்,மஞ்சள் தூள் சேர்த்து வதக்கி புளித்தண்ணீரை விட்டு கொதிக்கவிடவும்.காய் வெந்ததும் பருப்பைக் கொட்டி கலந்து உப்பு போட்டு சிறிது நேரம் கொதிக்கவிடவும்.கடைசியில் கொத்துமல்லி தழை தூவி இறக்கவும்.