சேப்பங்கிழங்கு வறுவல் (மற்றொரு முறை)

சேப்பங்கிழங்கு நம்மூரில் குட்டிக்குட்டியாகக் கிடைக்கும்.வேகவைத்து,தோலை உரித்தெடுத்துவிட்டு,முழு கிழங்கையும் இட‌து உள்ளங்கையில் வைத்து வல‌து உள்ளங்கையால் அழுத்தி ஓரங்களை லேஸாகத் தட்டிவிட்டு பின்வரும் முறையில் செய்வேன்.ஆனால் இங்கு ( USA ) இவை பெரிதாகக் கிடைப்பதால் அதேபோல் செய்தால் காரம்,உப்பு சரியாக உரைப்பதில்லை.எனவே பட்டைபட்டையாக நறுக்கி செய்துவிடுவேன்.

கிழங்கில் தயிர் சேர்ப்பதால் நன்றாக சிவந்து வரும்.அவ்வளவாக கொழகொழப்பு தெரியாது.நல்லெண்ணெய் அல்லது ஆலிவ் ஆயிலில் செய்யும்போது வாசனைக் கொஞ்சம் கூடுதலாகவும்,கூடுதல் சுவையுடனும் இருக்கும்.அதேபோல் பூண்டைத் தட்டிப் போடுவது நல்ல வாசனை,சுவையைக் கொடுக்கும்.அடிப் பிடிக்கும் என்பதால்தான் நறுக்கிப் போடுவதில்லை.

தேவையானவை:

சேப்பங்கிழங்கு_3
மிளகாய்த்தூள்_3 டீஸ்பூன்
மஞ்சள் தூள்_சிறிது
தயிர்_ஒரு டேபிள்ஸ்பூன்
பூண்டிதழ்_2
பெருங்காயம்_சிறிது
உப்பு_தேவைக்கு
எண்ணெய்_ இரண்டல்லது மூன்று டீஸ்பூன்

செய்முறை:

ஒரு பாத்திரத்தில் கிழங்குகளைப் போட்டு அவை மூழ்கும் அளவு தண்ணீர் விட்டு,வேகவைத்தெடுத்து,ஆறியதும் தோலை உரித்துவிட்டு படத்திலுள்ளதுபோல் நறுக்கி வைக்கவும்.

ஒரு கிண்ணத்தில் மிளகாய்த்தூள்,மஞ்சள்தூள்,பெருங்காயம்,உப்பு சேர்த்து கலந்து வைக்கவும்.

இப்போது நறுக்கி வைத்துள்ள துண்டுகளை ஒவ்வொன்றாக எடுத்து மிளகாய்த்தூள் கலவையில் எல்லா பக்கமும் புரட்டி எடுத்து ஒரு தட்டில் வைக்கவும்.இது மாதிரியே எல்லாவற்றையும் செய்து ஒரு 1/2 மணி நேரம் ஃப்ரிட்ஜில் வைக்கவும்.அல்லது வெளியில்கூட வைக்கலாம்.

ஒரு தோசைக்கல்லை அடுப்பில் வைத்து சூடேறியதும் பாதி எண்ணெய் விட்டு கல் கொண்ட மட்டும் கிழங்கு துண்டுகளை தனித்தனியாக வைத்து,இவற்றுடன் பூண்டிதழ்களை லேசாகத் தட்டிப்போட்டு மிதமானத் தீயில் மூடி போட்டு வேக விடவும்.

தயிரைக் கட்டியில்லாமல் கலக்கிக்கொள்ளவும்.

சிறிது நேரம் கழித்து துண்டுகளைத் திருப்பிவிட்டு,மீதமுள்ள எண்ணெயை சுற்றிலும் விட்டு,ஒவ்வொரு துண்டின் மீதும் சிறிது தயிரை ஸ்பூனால் தடவி விடவும்.

மீண்டும் துண்டுகளைத் திருப்பிவிட்டு முன்பு சொன்னதுபோலவே தயிரைத் தடவி விட்டு கிழங்கின் இரண்டு பக்கமும் நன்றாக சிவக்கும் வரை அடிக்கடி திருப்பிவிட்டு எடுத்து வைக்கவும்.

இப்போது சுவையான சேப்பங்கிழங்கு வறுவல் தயார்.

இது எல்லா சாதத்திற்கும் நன்றாகப் பொருந்தும்.

Advertisements

சேப்பங்கிழங்கு வடை

தேவையானவை:

சேப்பங்கிழங்கு_2
அரிசிமாவு_ஒரு டேபிள்ஸ்பூன்
மைதா_ஒரு டேபிள்ஸ்பூன்
சின்ன வெங்காயம்_4
பெப்பர் ஃப்ளேக்ஸ்_சிறிது அல்லது பச்சைமிளகாய்_1
இஞ்சி_சிறிது
பெருங்காயத்தூள்_சிறிது
முட்டை_1 (விருப்பமானால்)
ப்ரெட் தூள்_ஒரு கைப்பிடி
கறிவேப்பிலை_ஒன்றிரண்டு இலைகள்
கொத்துமல்லி இலை_ஒரு கொத்து
உப்பு_தேவைக்கு
கடலை எண்ணெய்_பொரிக்கத் தேவையான அளவு

செய்முறை:

சேப்ங்கிழங்கின் தோலை சீவிவிட்டு கேரட் துருவியில் துருவி ஒரு கிண்ணத்தில் வைக்கவும்.

இதனுடன் சின்ன வெங்காயம்,இஞ்சி,பச்சை மிளகாய்,கறிவேப்பிலை, கொத்துமல்லி இவற்றைப் பொடியாக நறுக்கிப் போட்டு பிசைந்துகொள்ளவும்.

அடுத்து மைதா,அரிசிமாவு,ப்ரெட் தூள்,உப்பு,பெருங்காயத்தூள் இவற்றை ஒன்றாகக் கலந்துகொள்ளவும்.பெப்பர் ஃப்ளேக்ஸ் போடுவதாக இருந்தால் இவற்றுடன் கலந்துகொள்ளலாம்.இவற்றையும் சேப்பங்கிழங்கு துருவலுடன் சேர்த்து நன்றாகக் கலந்துகொள்ளவும்.இது வடைமாவு பதத்தில் இருக்க வேண்டும்.முட்டை சேர்ப்பதாக இருந்தால் இப்போது சேர்த்து நன்றாகப் பிசைந்துகொள்ளவும்.முட்டை சேர்ப்பது எண்ணெய் குடிக்காமல் இருப்பதற்குத்தான்.தண்ணீர் எதுவும் சேர்க்க‌ வேண்டாம்.

ஒரு வாணலில் எண்ணெய் ஊற்றிக் காய்ந்ததும் மாவில் சிறிது எடுத்து உருட்டி வடை போல் தட்டி எண்ணெயில் போடவும்.

அல்லது போண்டா போல் போடலாம்.

ஒரு புறம் சிவந்ததும் மறுபுறம் திருப்பிவிட்டு சிவந்ததும் எடுத்துவிடவும்.

இப்போது சுவையான,க்ரிஸ்பியான வடை ரெடி.

டொமெட்டோ கெட்சப்புடன் சூப்பராக இருக்கும்.

ப்ரெட் தூள் சேர்ப்பதால் ஆறியபிறகும் கரகரப்பாக,மொறுமொறுப்பாக இருக்கும்.

இதேபோல் உருளைக்கிழங்கிலும் வடை அல்லது போண்டா செய்யலாம்.

சேப்பங்கிழங்கு சாம்பார்

தேவையானப் பொருள்கள்:

துவரம் பருப்பு_1/2 கப்
சேப்பங்கிழங்கு_4
சிறிய கத்தரிக்காய்_1
சின்ன வெங்காயம்_10
தக்காளி_1
புளி_கோலி அளவு
பூண்டு_2 பற்கள்
மஞ்சள் தூள்_1/4 டீஸ்பூன்
மிளகாய்த் தூள்_3 டீஸ்பூன்
தேங்காய்ப் பூ_ஒரு டீஸ்பூன்
கொத்துமல்லி இலை_1 கொத்து
உப்பு_தேவையான அளவு

தாளிக்க:

எண்ணெய்_2 டீஸ்பூன்
கடுகு
உளுந்து
சீரகம்
வெந்தயம்_சுமார் 5 லிருந்து 10 எண்ணிக்கை
காய்ந்த மிளகாய்_1
பெருங்காயம்_சிறிது
கறிவேப்பிலை

செய்முறை:

ஒரு குக்கரில் (அ) பாத்திரத்தில் பருப்பை எடுத்துக்கொண்டு நன்றாகக் கழுவிவிட்டு ,பருப்பு மூழ்கும் அளவு தண்ணீர் விட்டு,அதில் 2 சொட்டு விளக்கெண்ணெய்,சிறிது மஞ்சள் தூள்,பெருங்காயம் சேர்த்து குழைய வேக வைக்கவும்.

சேப்பங்கிழங்கை அது மூழ்கும் அளவு தண்ணீர் விட்டு காய் நன்றாக வேகும் வரை வேகவிட்டு (குழையாமல்) ஆறியதும் விருப்பமான வடிவத்தில் நறுக்கி வைக்கவும்.

வெங்காயம்,தக்காளி  இவற்றைப் பொடியாக நறுக்கி வைக்கவும்.பூண்டு உரித்து வைக்கவும்.கத்தரிக்காயை விருப்பமான வடிவத்தில் நறுக்கி தண்ணீரில் போட்டு வைக்கவும்.

புளியை அது மூழ்கும் அளவு தண்ணீர் விட்டு ஊற வைக்கவும்.

குழம்பு வைக்கும் பாத்திரத்தை அடுப்பில் ஏற்றி எண்ணெய் விட்டு சூடாகியதும் தாளிக்கக் கொடுத்துள்ளப் பொருள்களைத் தாளித்துவிட்டு வெங்காயம்,பூண்டு,தக்காளி,கத்தரிக்காய் இவற்றை அடுத்தடுத்து சேர்த்து வதக்கவும்.

இவை வதங்கியதும் மஞ்சள்தூள்,மிளகாய்த்தூள்,உப்பு சேர்த்து வதக்கி பருப்பைக் கடைந்து ஊற்றவும்.

உப்பு,காரம் சரிப்பார்த்து மூடி கொதிக்க விடவும்.

குழம்பு ஒரு கொதி வந்ததும் சேப்பங்கிழங்கை சேர்த்துக் கிண்டிவிட்டு மீண்டும் மூடி கொதிக்க விடவும்.

சிறிது நேரம் கழித்து புளியைக் கரைத்து ஊற்றி மேலும் இரண்டு கொதி வரும்வரை அடுப்பிலேயே இருக்கட்டும்.

கடைசியில் தேங்காய்ப் பூ,கொத்துமல்லி தூவி இறக்கவும்.இப்போது சேப்பங்கிழங்கு சாம்பார் தயார்.

இதன் சுவையும்,மணமும் அருமையாக இருக்கும்.

இது சாதம்,இட்லி,தோசை,பொங்கல் இவற்றிற்குப் பொருத்தமாக  இருக்கும்.

குறிப்பு:

1.இந்த சாம்பாரை கத்தரிக்காய் இல்லாமலும் வைக்கலாம்.

2.வெங்காயம்,தக்காளி வதக்கும்போது வேகவைத்து, நறுக்கிய சேப்பங்கிழங்கை சேர்த்து வதக்கியும் செய்யலாம்.

சேப்பங்கிழங்கு வறுவல் (மற்றொரு முறை)

தேவையானப் பொருள்கள்:

சேப்பங்கிழங்கு_3
உப்பு_தேவைக்கு

தாளிக்க:

நல்லெண்ணெய்_2 டீஸ்பூன்
பெருங்காயம்_சிறிது
மஞ்சள்தூள்_சிறிது
மிளகாய்த்தூள்_ஒன்றரை டீஸ்பூன்

செய்முறை:

ஒரு பாத்திரத்தில் சேப்பங்கிழங்கை எடுத்துக்கொண்டு அது மூழ்கும் அளவு தண்ணீர் விட்டு குழையாமல் வேக வைத்து,ஆறியதும் தோலை உரித்துவிட்டு விருப்பமான வடிவத்தில் நறுக்கி வைக்கவும்.

ஒரு கடாயை அடுப்பில் வைத்து எண்ணெய் ஊற்றி மிதமானத் தீயில் சூடாக்கி முதலில் பெருங்காயதையும் அடுத்தடுத்து மஞ்சள்தூள், மிளகாய்த்தூள் இவற்றைப் போட்டு (கருகாமல்) லேசாக சிவந்ததும் சேப்பங்கிழங்கைப் போட்டுக் கிளறிவிடவும்.

சிறிது உப்பும் சேர்த்துக் கிளறிவிட்டு மூடி வேக வைக்கவும்.தண்ணீர் விட வேண்டாம்.விட்டால் கிழங்கு குழைந்து போய் எல்லாத் துண்டுகளும் ஒன்றுடன் ஒன்று ஒட்டிக்கொள்ளும்.வேண்டுமானால் கூடுதலாகக் கொஞ்சம் எண்ணெய் விடலாம்.

மசாலா,கிழங்கு எல்லாம் ஒன்றாகச் சேர்ந்து வெந்து,வாசனை வரும் வரை அடுப்பிலேயே இருக்கட்டும்.அதுவரை இடையிடையே கிளறிவிடவும்.

இப்போது  சுவையான சேப்பங்கிழங்கு வறுவல் தயார்.

இது எல்லா வகையான சாதத்திற்கும் நல்ல பொருத்தமாக இருக்கும்.

சேப்பங்கிழங்கு வறுவல்/Arbi fry

            arbi fry

தேவையானவை:

சேப்பங் கிழங்கு_4
சீரகம்_ 1/4டீஸ்பூன்
பெருஞ்சீரகம்_1/4 டீஸ்பூன்
பெருங்காயம்_சிறிது
மிளகாய் தூள்_ 2 டீஸ்பூன்
மஞ்சள்தூள்_1/4 டீஸ்பூன்
தயிர்_1 டீஸ்பூன்
உப்பு_தேவையான அளவு
கறிவேப்பிலை_ 5 இலைகள்
எண்ணெய்_2 டீஸ்பூன்

செய்முறை:

சேப்பங்கிழங்கை வேகவைத்து தோல் உரித்து விருப்பமான வடிவத்தில் நறுக்கவும்.ஒரு வாணலியை அடுப்பில் ஏற்றி எண்ணெய் ஊற்றி சீரகம், பெருஞ்சீரகம்,பெருங்காயம்,கறிவேப்பிலை தாளித்து கிழங்கைப் போட்டு வதக்கவும்.பிறகு அதில் மிளகாய்த்தூள்,மஞ்சள் தூள்,உப்பு போட்டுக் கிளறி தயிர் சேர்த்து நன்றாக கிளறி மூடி போட்டு மிதமான தியில் வேகவிடவும்.நடுநடுவே கிளறிவிட்டு மசாலா சிவந்ததும் இறக்கவும்.

வறுவல்/பொரியல் இல் பதிவிடப்பட்டது . குறிச்சொற்கள்: , , , . Leave a Comment »