தேங்காய் சட்னி / Coconut chutney

IMG_4442

இந்த சட்னி சமையலில் ஆரம்பநிலையில் உள்ள‌வர்களுக்கானது.அரைச்சு வையுங்க,ஓட்ஸ் கிச்சடி ரெஸிப்பியுடன் வருகிறேன்.

தேவையானவை:

தேங்காய் பத்தை_10
பச்சை மிளகாய்_2 அல்லது காரத்திற்கேற்ப‌
பொட்டுக்கடலை_1/2 கைப்பிடி
இஞ்சி_சிறு துண்டு
உப்பு_தேவைக்கு

தாளிக்க:

எண்ணெய்,கடுகு,உளுத்தம் பருப்பு,காய்ந்த மிளகாய்_1,பெருங்காயம், கறிவேப்பிலை.

செய்முறை:

தேங்காய்ப் பத்தையின் பின்புறமுள்ள கறுப்புப் பகுதியைக் கத்தியால் நீக்கிவிட்டு சிறுசிறு துண்டுகளாக்கி மிக்ஸியில் போட்டு,அதனுடன் இஞ்சி,பச்சைமிளகாய்,பொட்டுக்கடலை,உப்பு சேர்த்து இரண்டு சுற்று சுற்றினால் பூபூவாக மசிந்திருக்கும்.

அதில் சிறிது தண்ணீர் விட்டு மேலும் இரண்டு சுற்றுசுற்றி,நிறுத்திவிட்டு சுற்றியுள்ளதை வழித்துவிட்டு,மேலும் சிறிது தண்ணீர்விட்டு இரண்டு சுற்றுசுற்றினால் தேங்காய் சட்னி தயார்.

முதலிலேயே நிறைய தண்ணீரை ஊற்றிவிட்டால் மிக்ஸி ஓடும்போது தண்ணீர் வெளியில் தெறிக்கும்.அதனால் சிறிதுசிறிதாக தேவைக்கேற்றார்போல் ஊற்றி அரைக்கவும்.

அவரவர் விருப்பம்போல் சட்னியை கெட்டியாகவோ அல்லது மேலும் சிறிது தன்ணீர்விட்டு கரைத்தோ வைத்துக்கொள்ளலாம்.

ஒரு தாளிக்கும் கரண்டியில் எண்ணெய்விட்டு,சூடாக்கித் தாளிக்க வேண்டியப் பொருள்களைத் தாளித்து சட்னியில் கொட்டிக்கலக்கவும்.

இது இட்லி,தோசை,உப்புமா,பொங்கல்,கிச்சடி,அடை,வடை,பஜ்ஜி, போண்டா என எல்லாவற்றுக்கும் பொருத்தமாக இருக்கும்.

இதையே அம்மியில் வைத்து கெட்டியாக அரைத்து துவையலாகவும் பயன்படுத்தலாம்.அம்மியில் அரைப்பதானால் தேங்காயைத் துருவிக்கொண்டு அரைக்க வேண்டும்.

Advertisements
துவையல்/சட்னி இல் பதிவிடப்பட்டது . குறிச்சொற்கள்: , , , , . 22 Comments »

தேங்காய் சாதம்

 

தேங்காய் சாதத்திற்கு தேர்ந்தெடுக்கும் தேங்காய் ஃப்ரெஷ்ஷாக இருக்க வேண்டும்.கொஞ்சம் இனிப்பான,சதைப்பற்றுள்ளத் தேங்காயானால் சுவை அதிகமாக இருக்கும்.

முந்திரி,வேர்க்கடலை இவற்றைப் போட வேண்டுமென்பதில்லை. விருப்பமானால்,வீட்டில் இருந்தால் போடலாம்.

சாதத்தை அடுப்பிலிருந்து இறக்கும்போது அப்பளத்தைப் பொரித்து,நொருக்கிப் போட்டும் இறக்கலாம்.

தேவையானவை:

அரிசி_ஒரு கப்
தேங்காய்ப்பூ_ஒரு கப்
இஞ்சி_சிறுதுண்டு
பச்சைமிளகாய்
உப்பு_தேவைக்கு

தாளிக்க:

நல்லெண்ணெய்
கடுகு
உளுந்து
சீரகம்
கடலைப்பருப்பு
வேர்க்கடலை
முந்திரிபருப்பு
பெருங்காயம்
காய்ந்தமிளகாய்
கறிவேப்பிலை

செய்முறை:

அரிசியுடன் சிறிது உப்பு சேர்த்து  வேக வைத்து உதிர் உதிராக வரும் பக்குவத்தில் வடித்து,பிறகு ஆறவைக்கவும்.

ஒரு வாணலை அடுப்பிலேற்றி,எண்ணெய் விட்டுத் தாளிக்க வேண்டியவற்றைத் தாளித்துவிட்டு, இஞ்சி, பச்சைமிளகாய்  சேர்த்து வதக்கவும்.

அடுத்து தேங்காய்ப்பூ சேர்த்து நன்றாக வதக்கவும்.இது வதங்கும்போதே சிறிது உப்பை ஸ்ப்ரே பன்னவும்.ஏற்கனவே சாதத்தில் உப்பு சேர்த்து வடித்திருக்கிறோம்.

தேங்காய்ப்பூ நன்றாக வதங்கி சிவந்து வரும்போது ஆறிய சாதத்தைக்கொட்டிக் கிளறவும்.சாதம் சூடேறியதும் அடுப்பிலிருந்து இறக்கவும்.

மிக எளிதாக செய்யக்கூடிய தேங்காய் சாதம் தயார்.

இதற்கு அப்பளம்,வத்தல்,பருப்புத் துவையல்,வறுவல்,பொரியல் எல்லாமே நன்றாக இருக்கும்.

நிறைய சாத வகைகள் செய்யும்போது இதையும் செய்தால் கலர்கலரான சாதங்களுக்கு மத்தியில் பளீர் வெண்மையுடன் கலக்கலாக இருக்கும்.இதனை மீதமான சாதத்திலும் செய்யலாம்.

 

சாதம் இல் பதிவிடப்பட்டது . குறிச்சொற்கள்: , , , , , , , . 6 Comments »

தேங்காய்,பொட்டுக்கடலை,கொத்துமல்லி சட்னி

தேவையானப் பொருள்கள்:

தேங்காய்_1/4 மூடி

பொட்டுக் கடலை_1/4 கப்

கொத்துமல்லி இலை_ஒரு கைப்பிடி  (உருவியது)

பச்சை மிளகாய்_2

முந்திரி_2

இஞ்சி_ஒரு சிறிய துண்டு

உப்பு_தேவையான அளவு

தாளிக்க:

நல்லெண்ணெய்_1 டீஸ்பூன்

கடுகு

உளுந்து

காய்ந்த மிள்காய்_1

பெருங்காயம்

கறிவேப்பிலை_5 இலைகள்

செய்முறை:

தேவையானப் பொருள்களை எடுத்து வைக்கவும்.தேங்காயை சிறுசிறு துண்டுகளாக்கி மிக்ஸியில் போட்டு பல்ஸில் வைத்து ஒரு சுற்று சுற்றி ,பிறகு அதனுடன் தேவையானப் பொருள்கள் எல்லாவற்றையும் சேர்த்து , தேவையான அளவு தண்ணீரையும்  சேர்த்து மைய‌ அரைத்தெடுக்கவும்.அதை ஒரு கிண்ணத்தில் வழித்து எடுக்கவும்.

ஒரு வாணலியை அடுப்பில் வைத்து எண்ணெய் ஊற்றி சூடேற்றித் தாளிக்கக் கொடுத்துள்ளப் பொருள்களை ஒன்றன் பின் ஒன்றாக சேர்த்து தாளித்து மூடி வைக்கவும்.இது இட்லி,தோசை,வடை,அடை போன்றவற்றிற்குப் பக்க உணவாகப் பயன்படுத்தலாம்.கெட்டியாக அரைத்தால் துவையலாகவும் உபயோகிக்கலாம்.

தேங்காய்,ரவை பர்பி

தேவையானப் பொருள்கள்:

ரவை_1 கப்

தேங்காய்ப் பூ_2 கப்

சர்க்கரை_2 கப்

முந்திரி_10

நெய்_1/4 கப்

ஏலக்காய்_1

தண்ணீர்_2 கப்

செய்முறை:

ரவை,தேங்காய்ப் பூ இவற்றை  தனித்தனியாக ஒவ்வொரு ஸ்பூன் நெய்யில் சிவக்க வறுத்துக்கொள்ளவும்.மேலும் சிறிது நெய் ஊற்றி முந்திரியை வறுத்துக்கொள்ளவும்.ஏலக்காயைப் பொடிதுக்கொள்ளவும்.

ஒரு கெட்டியான பாத்திரத்தில் தண்ணீர்,சர்க்கரை எடுத்துக்கொண்டு அடுப்பில் ஏற்றி பாகு காய்ச்சவும்.நல்ல கம்பிப்பதம் வர வேண்டும்.(ஒரு கரண்டியில் சிறிது பாகை எடுத்து இரண்டு விரல்களில் தொட்டு உருட்டி விரல்களைப் பிரித்தால் விரல்களுக்கிடையே கம்பி போன்று வர வேண்டும்.இதுதான் கம்பிப் பதம்.)

இப்போது ரவையை சிறிது சிறிதாக பாகில் கொட்டிக் கட்டி இல்லாமல் கிளற வேன்டும்.அடுத்து தேங்காய்ப் பூவை அதேபோல் கொட்டிக்கிளறவும்.தீ மிதமாக இருக்கட்டும்.ஏலப் பொடியைத் தூவி இடையிடையே நெய் ஊற்றிக் கிளறிக்கொண்டே இருக்கவும்.கொஞ்ச நேரம் கழித்து கலவை பாத்திரத்தில் ஒட்டாமல் வரும்.அதுதான் சரியான பர்பி பதம்.அப்போது கலவையை நெய் தடவிய ஒரு தட்டில் கொட்டி பரப்பி விடவும்.வறுத்த முந்திரியைத் தூவி அலங்கரித்து ஆற வைக்கவும்.கொஞ்சம் ஆறியதும் ஒரு கத்தியால் சதுரமாகவோ(அ)டைமன்ட் வடிவத்திலோ துண்டுகள் போடவும்.நன்றாக ஆறிய பிறகு ஒரு கண்ணாடி பாட்டிலில்(அ)பிளாஸ்டிக் கவரில் எடுத்து வைக்கவும்.

இப்போது மிகவும் சுவையான,இனிப்பான,சாஃப்டான தேங்காய்,ரவை பர்பி தயார்.

இடியாப்பம்

தேவையான பொருட்கள்
பச்சரிசி –  2கப்புகள்
உப்பு -1 சிட்டிகை
தேங்காய்- 1/2 மூடி
பால் – 1 கப்
சர்க்கரை – தேவையான அளவு
ஏலக்காய் – 1
செய்முறை:

பச்சரிசியை சுமார் 2 மணி நேரத்திற்கு ஊறவைத்து வடிகட்ட வேண்டும். பிறகு  சிறிது  ஈரப்பதத்துடனே மிக்சியில் பொட்டு ஈர மாவாக இடித்துக் கொள்ளவும். பின் இட்லி பானையை அடுப்பில் ஏற்றி ஒரு இட்லி கொத்தில் துணியைப் போட்டு மாவை நன்றாக அவிக்கவேண்டும். மூடியைத்திறந்து மாவை கைகளால் தொட்டால் ஒட்டக் கூடாது. அந்தப் பதத்தில் மாவை இறக்கி உதிர்த்து ஆற வைக்க வேண்டும்.ஆறியதும் ஒரு சிட்டிகை உப்பு சேர்த்து இளஞ் சூடான தண்ணீர் சிறிது சிறிதாக சேர்த்து நன்றாக முறுக்கு மாவு பதத்தில் பிசைந்து கொள்ள வேண்டும். மீண்டும் இட்லி பானையை அடுப்பில் ஏற்றிவிட்டு ஒரு இட்லி தட்டில் ஈரத்துணியைப் போட்டு சிறிது மாவை இடியாப்ப அச்சில் போட்டு தட்டு முழுவதும் பிழிந்து விட வேண்டும். பின் அதை இட்லிப் பானையில் வைது வேக விட வேண்டும். ஆவி வந்ததும் எடுத்து ஒரு தட்டில் கொட்டி தேங்காய்ப்பாலை விட்டு சாப்பிட சுவையோ சுவை. இல்லை எனில் காய்கறி குருமா அல்லது கோழி குருமா சேர்த்து சாப்பிடலாம்.

தேங்காய்ப் பால் செய்முறை:

பாலைக் காய்ச்சவும்.தேங்காயைத் துருவி மிக்ஸியில் போட்டு இளஞ்சூடான தண்ணீர் சேர்த்து நன்றாக அரைத்து முதல் பால் பிழிந்து எடுத்துக்கொண்டு மீண்டும் ஒருமுறை அறைத்து இரண்டாம் பாலையும் பிழிந்து எடுத்துக்கொள்ளவும். இதை பாலுடன் கலந்து சர்க்கரை,பொடித்த எலக்காய் சேர்த்து கலக்கவும்.

குறிப்பு:

மாவை பிசைந்த பிறகு கைகளால் தொட்டால் ஒட்டக் கூடாது. ஒட்டினால் மாவு நன்றாக வேகவில்லை என்று அர்த்தம்.எனவே மாவில் சிறிது நீர் தெளித்து மைக்ரோ அவனில் ஓரிரு மணித்துளிகள் வைத்து எடுக்கவும்.