அரிசி உருண்டை

 

அரிசியை வறுக்கும்போது வாணல் நல்ல சூடாக இருக்க வேண்டும். அப்போதுதான்  அரிசி பூ மாதிரி பொரிந்து வரும். இல்லையென்றால் சரியாகப் பொரியாமல்  அரிசியின் நிறம் மட்டும் மாறியிருக்கும்.

அரிசியை வறுக்கத்தான் நேரமெடுக்கும்.மற்ற வேலைகள் கடகடவென முடிந்துவிடும்.இது எளிதாக செய்யக்கூடிய இனிப்பு.

தேவையானப் பொருள்கள்:

புழுங்கலரிசி_ஒரு கப்
பொடித்த வெல்லம்_ஒரு கப்
தேங்காய்ப்பூ_ஒரு டீஸ்பூன் (விருப்பமானால்)
தண்ணீர்_2 கப்
ஏலக்காய்_1

செய்முறை:

ஒரு அடி கனமான வாணலியை அடுப்பில் ஏற்றி நன்றாக சூடேறியதும்  ஒரு கைப்பிடி அளவு அரிசியைப் போட்டு ஒரு தோசைத் திருப்பியால் விடாமல் கிண்டிக்கொண்டே இருக்க வேண்டும்.

அரிசி நன்றாகப் பொரிந்து வந்ததும் எடுத்து ஒரு பாத்திரத்தில் கொட்டி ஆறவிடவும்.

இவ்வாறே எல்லா அரிசியையும் பொரித்து ஆற வைத்து மிக்ஸியில் போட்டு,கூடவே ஏலக்காயையும் போட்டு ரவை பதத்திற்கு இடித்துக்கொள்ளவும்.

மைய இடிக்க வேண்டாம்.அது பொரி மாவாகிவிடும்.தண்ணீரும் ஊற்ற வேண்டாம்.

ஒரு கனமான பாத்திரத்தில் வெல்லத்தைப்போட்டு,அது மூழ்குமளவு தண்ணீர் ஊற்றி சூடாக்கவும்.வெல்லம் கரைந்ததும் வடிகட்டி (மண்,தூசு போக) மீண்டும் அடுப்பில் வைத்து கொதிக்க விடவும்.

கொதிக்க ஆரம்பித்ததும் தீயை மிதமாக வைத்துக்கொண்டு இடித்து வைத்துள்ள மாவைக் கொட்டி,விடாமல் கிளறிவிடவும்.கிளறுவதற்கு   whisk  ஐப் பயன்படுத்தினால் கட்டிகளில்லாமல் வரும்.பாகுப்பதமெல்லாம் வேண்டாம்.

எல்லா மாவையும் கொட்டிக் கிளறிய பிறகு  whisk  ஐ எடுத்துவிட்டு சிறு கரண்டியைப் பயன்படுத்திக்கொள்ளலாம்.

சிறிது நேரத்திலேயே வெந்துவிடும்.நன்றாக வெந்துவிட்டால் ரவை இருப்பது மாதிரி தெரியாது.இப்போது தேங்காய்ப்பூவை சேர்த்துக்கிளற வேண்டும்.

பிறகு இறக்கி ஆறவைத்து லேசாக சூடு இருக்கும்போது உருண்டைகளாகப் பிடிக்க வேண்டும்.

அல்லது இறக்கியவுடன் ஒரு தட்டில் கொட்டி பரப்பி துண்டுகள் போட்டு சாப்பிடலாம்.

புழுங்கலரிசி முறுக்கு

தேவையானப் பொருள்கள்:

புழுங்கல் அரிசி_2 கப்
பொட்டுக்கடலை_1/4 கப்
காய்ந்த மிளகாய்_5 லிருந்து 8 க்குள்
தேங்காய்ப்பால்_ஒரு கப் (விருப்பமானால்)
எள்_கொஞ்சம்
ஓமம்_சிறிது
பெருங்காயம்_சிறிது
உப்பு_தேவைக்கு
கடலையெண்ணெய்_பொரிக்க‌

செய்முறை:

அரிசியை நீரில் நனைத்து நன்றாக ஊறிய பிறகு கழுவிவிட்டு கிரைண்டரில் போட்டு,அதனுடன் காய்ந்த மிளகாய் சேர்த்து, தேங்காய்ப்பால் விட்டு அல்லது தண்ணீர் தெளித்து மைய அரைக்க வேண்டும்.மிகவும் கெட்டியாகவும் இருக்க வேண்டும்.

பொட்டுக்கடலையை மிக்ஸியில் போட்டு நல்ல‌ மாவாக இடித்துக்கொள்ளவும்.

இப்போது அரிசி மாவுடன் பொட்டுக்கடலை மாவு,எள்,ஓமம், பெருங்காயம், உப்பு சேர்த்து பிசைந்துகொள்.

மாவு கெட்டியாக இல்லாமல் இருந்தால் பேப்பர் டவலில் அல்லது ஒரு காட்டன் துணியில் சிறிது நேரம் சுருட்டி வைத்தால் ஈரம் போய்விடும்.

இப்போது வாணலியில் எண்ணெய் ஊற்றி காய வைக்கவும்.

எண்ணெய் காய்ந்ததும் விருப்பமான முறுக்கு அச்சைப் பயன்படுத்தி, பிசைந்த மாவில் ஒரு பெரிய எலுமிச்சை அளவு எடுத்து ஒரு பேப்பர் டவலில் முறுக்குகளாக பிழிந்து கொள்ளவும்.(அல்லது அப்படியே வாணலியில்கூட பிழிந்துவிடலாம்.)

எண்ணெய் காய்ந்ததும் ஒவ்வொன்றாக எடுத்துப் போட்டு(எண்ணெய் கொண்ட மட்டும்) இரு புறமும் சிவக்க விட்டு நன்றாக வெந்ததும் எடுக்கவும். இப்போது புழுங்கல‌ரிசி முறுக்கு தயார்.

பச்சரிசி முறுக்கைவிட புழுங்கலரிசி முறுக்குதான் சுவையாக இருக்கும்.என்ன,கொஞ்சம் வேலை வாங்கும். அவ்வளவுதான்.