முள்ளங்கிப் பொரியல்

தேவையானப் பொருள்கள்:

முள்ளங்கி_1
சின்ன வெங்காயம்_2
மிளகாய்த்தூள்_1/2 டீஸ்பூன்
மஞ்சள் தூள்_சிறிது
தேங்காய்ப்பூ_ஒரு டீஸ்பூன்
வேக வைத்து பிழிந்த துவரம் பருப்பு_1/2 கைப்பிடி
கொத்துமல்லி இலை_ஒருகொத்து
உப்பு_தேவைக்கு

தாளிக்க:

நல்லெண்ணெய்
கடுகு
உளுந்து
சீரகம்
கடலைப்பருப்பு
பெருங்காயம்
கறிவேப்பிலை

செய்முறை:

முள்ளங்கியைக் கழுவிவிட்டு விருப்பமான வடிவத்தில் நறுக்கிக்கொள்ளவும்.

சின்ன வெங்காயத்தைப் பொடியாக நறுக்கவும்.

ஒரு கடாயை அடுப்பில் ஏற்றி எண்ணெய் விட்டுக் காய்ந்ததும் தாளிக்கக் கொடுத்துள்ளவற்றை அடுத்தடுத்து தாளித்துவிட்டு முதலில் வெங்காயத்தை சேர்த்து வதக்கவும்.

அடுத்து முள்ளங்கி சேர்த்து வதக்கவும்.வதங்கியதும் மிளகாய்த்தூள், மஞ்சள்தூள்,உப்பு சேர்த்து வதக்கி சிறிது தண்ணீர் தெளித்து மூடி வேக வைக்கவும்.

முள்ளங்கி சீக்கிரமே வெந்துவிடும்.தண்ணீர் வற்றிக் காய் வெந்ததும் துவரம் பருப்பு சேர்த்துக் கிளறி விடவும்.

அடுத்து தேங்காய்ப்பூ,கொத்துமல்லி இலை சேர்த்துக் கிளறிவிட்டு இறக்கவும்.

இது எல்லா வகையான சாதத்திற்கும் பொருத்தமாக இருக்கும்.

Advertisements

முள்ளங்கி சாம்பார்

 

தேவை:

முள்ளங்கி_1
துவரம் பருப்பு_ 3/4 கப்
சின்ன வெங்காயம்_10
தக்காளி_2
புளி_சிறு கோலி அளவு
பூண்டு_3 பற்கள்
மஞ்சள் தூள்_1/4 டீஸ்பூன்
மிளகாய்த் தூள்_2 டேபிள்ஸ்பூன்
கொத்துமல்லி இலை_1 கொத்து
உப்பு_தேவையான அளவு

தாளிக்க:

எண்ணெய்_2 டீஸ்பூன்
கடுகு_கொஞ்சம்
உளுந்து_கொஞ்சம்
சீரகம்_கொஞ்சம்
வெந்தயம்_கொஞ்சம்
பெருங்காயம்_சிறிது
கறிவேப்பிலை_5 இலைகள்
செய்முறை:

துவரம் பருப்பைக் குழைய வேகவிடவும். புளியை 1/2 கப் தண்ணீரில் ஊறவைக்கவும்.முள்ளங்கியைக் கழுவி சுத்தம் செய்து விருப்பமான வடிவத்தில் நறுக்கி வைக்கவும்.வெங்காயம்,தக்காளி நறுக்கி வைக்கவும்.

ஒரு பாத்திரத்தில் எண்ணெய் ஊற்றி தாளிக்கக்கொடுத்துள்ள பொருள்களை ஒன்றன் பின் ஒன்றாக‌ தாளிக்கவும்.  தாளித்ததும் முதலில் வெங்காயம், பூண்டு  சேர்த்து வதக்கவும்.அடுத்து தக்காளி சேர்த்து நன்கு வதக்கி,பிறகு முள்ளங்கி சேர்த்து வதக்கவும்.இவை நன்றாக வதங்கியதும் மிளகாய்த் தூள்,மஞ்சள் தூள் சேர்த்து ஒரு வதக்கு வதக்கி பருப்புத் தண்ணீரை ஊற்றி உப்பு போட்டு காரம் சரிபார்த்து கொதிக்கவிடவும்.  நன்றாகக் கொதித்து காய் வெந்ததும் புளித்தண்ணீரை ஊற்றி கொதிக்கவிடவும்.பிறகு கொத்துமல்லி இலை தூவி இறக்கவும்.விருப்பமானால் இறக்கும்போது சிறிது தேங்காய்ப்பூ சேர்க்கலாம்.

குறிப்பு:

முள்ளங்கி சாம்பருக்கு மற்ற சாம்பாரைப்போல் புளி அதிகம் தேவை இல்லை.வழக்கமாகப் போடுவதில் பாதி போட்டாலே போதும்.

முள்ளங்கி பரோட்டா


தேவை:

கோதுமை மாவு_3 கப்

முள்ளங்கி_1/2 துண்டு

சின்ன வெங்காயம்_2

பச்சை மிளகாய்_1

தயிர்_1 டீஸ்பூன்

கொத்துமல்லி இலை_1 கொத்து

மிளகாய் தூள்_1 டீஸ்பூன்

மஞ்சள் தூள்_1/4 டீஸ்பூன்

உப்பு_தேவையான அளவு

தாளிக்க:

ஓமம்

சீரகம்

பெருங்காயம்_சிறிது

எண்ணெய்_1 டீஸ்பூன்

செய்முறை:

முள்ளங்கியை கழுவித் துடைத்து கேரட் துருவியால் துருவவும். வெங்காயத்தையும் அவ்வாறே துருவவும்.பச்சை மிளகாயை பொடியாக ந‌றுக்கவும். ஒரு வாண‌லியில் எண்ணெய் ஊற்றி காய்ந்ததும் ஓமம்,சீரகம்,பெருங்காயம் தாளித்து முள்ளங்கி,சி.வெங்காயம்,பச்சை மிளகாய்,மிளகாய் தூள்,மஞ்சள் தூள் சேர்த்து வதக்கவும்,தண்ணீர் ஊற்ற‌ வேண்டாம்.வதங்கிய பிறகு கொத்துமல்லி இலை தூவி இறக்கவும்.

கலவை சிறிது இளஞ்சூடாக இருக்கும்போதே கொதுமை மாவு,தயிர்,உப்பு சேர்த்து நன்றாக சப்பாத்தி மாவு பதத்தில் பிசைந்துகொள்ள வேண்டும்.தண்ணீர் போதவில்லை என்றால் மட்டுமே தண்ணீர் சேர்த்து பிசைய வேண்டும்.ஒரு ஈரத்துணியை(அ)பேப்பர் டவலை நனைத்து பிழிந்து மாவின் மீது போட்டு மூடி வைக்கவும்.சுமார் ஒன்று(அ)2 மணி நேரமாவது ஊறட்டும்.

அடுப்பில் தோசைக் கல்லை வைத்து சூடேற்றவும்.அது சூடேறியதும் ஒரு எலுமிச்சை அளவு மாவு எடுத்து சப்பாத்தியாக தேய்த்து சப்பாத்தி சுடுவது போலவே சுட்டெடுக்கவும்.விருப்பமான குருமாவுடன் சாப்பிட சுவையாக இருக்கும்.

இன்னும் சிவப்பு முள்ளங்கியாக இருந்தால் சப்பாத்தி சிறிது ரோஸ் நிறத்தில் அழகாக இருக்கும்.