ப்ரோக்கலி ரே(ய்)ப் பொரியல்/Broccoli rabe poriyal

இதனை கீரைப் பொரியல் போலவே செய்ய வேண்டியதுதான்.சமைக்கும் நேரமும் குறைவு.சுவையோ சாதாரண கீரையைவிட அதிகம்.

தேவையானவை:

ப்ரோக்கலி ரே(ய்)ப் நறுக்கியது_ஒரு கிண்ணம்
சின்னவெங்காயம்_3
பச்சை மிளகாய்_1
தேங்காய்ப் பூ_ஒரு டீஸ்பூன்
கொத்துமல்லி இலை_ஒரு கொத்து

தாளிக்க:

எண்ணெய்,கடுகு,உளுந்து,சீரகம்,கடலைப்பருப்பு,காய்ந்த மிளகாய் ஒன்று,பெருங்காயம்,கறிவேப்பிலை.

செய்முறை:

ப்ரோக்கலி ரே(ய்)பை சுத்தம்செய்து,நீரில் அலசிய பிறகு விருப்பமான அளவில் அரிந்து வைக்கவும். வெங்காயம், பச்சை மிளகாயையும் அரிந்து வைக்கவும்.

ஒரு வாணலில் எண்ணெய் விட்டு தாளிக்க வேண்டியதைத் தாளித்த பிறகு வெங்காயம்,பச்சை மிளகாய் சேர்த்து வதக்கவும்.

இவை வதங்கியதும் ப்ரோக்கலி ரே(ய்)பை சேர்த்து இரண்டு கிளறுகிளறி உப்பு,தேங்காய்ப் பூ,கொத்துமல்லி இலை தூவி இறக்கவும்.

ப்ரோக்கலி ரே(ய்)ப் சீக்கிரமே வெந்துவிடும்.மூடி போட்டு,தண்ணீர் தெளித்து மற்ற கீரைகள் மாதிரி வேகவைக்க வேண்டாம்.

இது எளிமையான,சத்தான,சீக்கிரமே செய்யக்கூடிய அருமையான பொரியலாகும்.

அவரைக்காய்&வேர்க்கடலை பொரியல்

தேவையானவை:

அவரைக்காய் நறுக்கியது_ஒரு கிண்ணம்
பச்சை வேர்க்கடலை(அ)காய்ந்த வேர்க்கடலை_ஒரு கைப்பிடி
சின்ன வெங்காயம்_இரண்டு
மிளகாய்த்தூள்_ஒரு டீஸ்பூன்
மஞ்சள்தூள்_சிறிது
கொத்துமல்லி இலை
தேங்காய்ப்பூ_ஒரு டீஸ்பூன்
உப்பு_தேவைக்கு

தாளிக்க:

எண்ணெய்
கடுகு,உளுந்து,சீரகம்,கடலைப் பருப்பு,பெருங்காயம்,கறிவேப்பிலை

செய்முறை:

பச்சை வேர்க்கடலையானால் அப்படியே சேர்த்துக்கொள்ளலாம்.காய்ந்தது என்றால் முதல் நாளே ஊற வைத்து,நன்றாக ஊறியதைப் பயன்படுத்த வேண்டும்.

அவரைக்காய்,வெங்காயம் இவற்றை விருப்பமான வடிவத்தில் அரிந்து கொள்ளவும்.

ஒரு வாணலில் எண்ணெய் விட்டு சூடானதும் தாளிக்க வேண்டியதைத் தாளித்துவிட்டு,முதலில் வெங்காயத்தையும்,அடுத்து அவரைக்காய், வேர்க்கடலை சேர்த்து வதக்கவும்.

இவை வதங்கியதும் மஞ்சள்தூள்,மிளகாய்த்தூள்,உப்பு சேர்த்துக்கிளறி காய் வேகுமளவு தண்ணீர் ஊற்றி மூடி வேக வைக்கவும்.

இடையிடையே கிண்டி விடவும்.அவரை,கடலை இரண்டும் வெந்து தண்ணீர் வற்றியதும் தேங்காய்ப்பூ&கொத்துமல்லி தூவி இறக்கவும்.

கோஸ் பொரியல்_மற்றொரு முறை

 

தேவையானவை:

கோஸ் நறுக்கியது_ஒரு கிண்ணம்
பச்சை மிளகாய்_1
தேங்காய்ப் பூ_ஒன்றிரண்டு டீஸ்பூன்கள்
கொத்துமல்லி இலை
உப்பு_தேவைக்கு

தாளிக்க:

எண்ணெய்
கடுகு
உளுந்து
சீரகம்
கடலைப் பருப்பு
பெருங்காயம்
கறிவேப்பிலை

செய்முறை:

கோஸிலிருந்து முழு இலைகளாகப் பிரித்தெடுத்துக் கழுவிவிட்டு,நீரை வடித்துவிட்டு, இலைகளின் நடுவிலுள்ள தண்டை நீக்கிவிட்டு, இலைகளை மட்டும் நீளவாக்கில் மிக மெல்லியதாக நறுக்கவும்.

காரம் விரும்பினால் பச்சை மிளகாயைப் பொடியாகவும்,இல்லையென்றால் லேசாகக் கீறியும் வைக்கவும்.

ஒரு வாணலை அடுப்பிலேற்றி எண்ணெய் விட்டுத் தாளிக்க வேண்டியவைகளைத் தாளித்துவிட்டு,மிளகாயைச் சேர்த்து ஒரு வதக்கு வதக்கி,கோஸை சேர்த்துக் கிளறி,சிறிது உப்பு தூவி மூடி போடாமல் வேக விடவும்.மூடினால் நிறம் மாற வாய்ப்புண்டு.

கோஸ் சீக்கிரமே வெந்துவிடும்.வெந்தபிறகு தேங்காய்ப் பூ,கொத்துமல்லி தூவி இறக்கவும்.

வறுவல்/பொரியல் இல் பதிவிடப்பட்டது . குறிச்சொற்கள்: , , , , . 6 Comments »

பலாக்கொட்டைப் பொரியல்

 

பலாப்பழம் வாங்கும்போது ஒரு சிறு கீற்றுதான் வாங்குவோம்.நிறைய வாங்க ஆசைதான்.அதன் விலையைப் பார்த்து பயந்து சுமார் 10 சுளைகள் உள்ளதாக வாங்கி வருவோம்.இந்த முறை துணிந்து (எத்தனை நாளைக்குத்தான் மான் தண்ணீர் குடிப்பது மாதிரியே நடிப்பது?) வாங்கியதில் 20 சுளைகளுக்கும் அதிகமாக இருந்தது.பழத்தை சாப்பிட்டுவிட்டு அதிலுள்ள கொட்டைகளை  பத்திரமாக எடுத்துவைத்து பொரியல் செய்துவிட்டேன்.நிறைய வாங்கியிருந்தால் இதை வைத்து கூட்டு, குருமா,சாம்பார் முதலியவை செய்திருக்க‌லாம்.

எங்க ஊர் பலாப்பழத்தைப் பார்க்க இங்கே வரவும்.பலாக்கொட்டை சாம்பாருக்கு இங்கே வரவும்.

தேவையானவை:

பலாக்கொட்டை_சுமார் 20 (எண்ணிக்கையில்)
மிளகாய்த்தூள்_ஒன்றரை டீஸ்பூன்
மஞ்சள்தூள்_சிறிது
உப்பு_தேவைக்கு

தாளிக்க:

எண்ணெய்
கடுகு
உளுந்து
சீரகம்
பெருங்காயம்
கறிவேப்பிலை

செய்முறை:

பலாக்கொட்டையை சமைக்குமுன் மேலேயுள்ள ஷெல் போன்ற பகுதியை எடுத்துவிட்டு அது மூழ்கும் அளவு தண்ணீர் விட்டு ஒரு 1/4 மணி நேரம் ஊற வைக்கவும்.இது ப்ரௌன் நிறத்தினாலான  மற்றொரு தோலை எடுப்பதற்கு.

ஊறியதும் அதன் தோலை கட்டைவிரல் நகத்தால் உரித்தோ அல்லது சுரண்டியோ எடுத்துவிடவும்.சில மென்மையான பகுதிகளில் தோல் எடுக்க வராது.அதை விட்டுவிடலாம்.

பிறகு விருப்பமான அளவில் நறுக்கிக்கொள்ளவும்.அல்லது முழு அளவிலேயே போட்டுக்கொள்ளலாம்.பார்க்க சிறுசிறு முட்டைகள் போல் இருக்கும்.

ஒரு வாணலை அடுப்பிலேற்றி எண்ணெய் விட்டுத் தாளிக்க வேண்டியவற்றைத் தாளித்துவிட்டு பலாக்கொட்டைகளைப் போட்டு ஒரு கிளறி கிளறி மிளகாய்த்தூள்,மஞ்சள்தூள்,உப்பு சேர்த்துப் பிரட்டிவிட்டு பலாக்கொட்டை மூழ்கும் அளவு தண்ணீர் விட்டு மூடி வேகவைக்கவும்.

அது நன்றாக வெந்து வரும்வரை இடையிடையே கிண்டிவிடவும்.தண்ணீர் வற்றி,நன்றாக வெந்ததும் இறக்கவும்.இது எல்லா சாதத்திற்கும் நன்றாக இருக்கும்.

விருப்பமானால் தேங்காய்ப்பூ,கொத்துமல்லி தூவி இறக்கலாம்.

பீன்ஸ் பொரியல் (மற்றொரு வகை)

 

தேவையானவை:

பீன்ஸ்_ஒரு கிண்ணம்
பச்சைப் பருப்பு_ஒரு கைப்பிடி
வெந்த துவரம்பருப்பு_1/2 கைப்பிடி
மிளகாய்த்தூள்_ஒரு டீஸ்பூன்
மஞ்சள் தூள்_சிறிது
உப்பு_தேவைக்கு

தாளிக்க:

எண்ணெய்
கடுகு
உளுந்து
சீரகம்
கடலைப் பருப்பு
பெருங்காயம்
கறிவேப்பிலை

செய்முறை:

பச்சைப்பருப்பை வெறும் வாணலில் போட்டு விவக்க வறுத்து,ஆறியதும் கழுவிவிட்டு, ஒரு கடாயில் எடுத்துக்கொண்டு,அது வேகும் அளவை விட சிறிது கூடுதலாகத் தண்ணீர் விட்டு,சிறிது மஞ்சள்தூள்,பெருங்காயம் சேர்த்து  அடுப்பில் ஏற்றவும்.

பீன்ஸை விருப்பமான அளவில் நறுக்கவும்.

பருப்பு பாதி வெந்த நிலையில் நறுக்கி வைத்துள்ள பீன்ஸை அதனுடன் சேர்த்து,தேவையான உப்பும் சேர்த்து வேக வைக்கவும்.

காய் வெந்துகொண்டிருக்கும்போதே மிளகாய்த்தூளை சேர்த்துக் கிளறி விடவும்.

காய் வெந்து,நீர் வற்றியதும் வெந்த துவரம்பருப்பு சேர்த்துக் கிளறவும்.

ஒரு கரண்டியில் எண்ணெய் விட்டுத் தாளிக்க வேண்டியதைத் தாளித்து பொரியலில் கொட்டிக் கிளறி இறக்கவும்.

விருப்பமானால் இறக்கும்போது தேங்காய்ப்பூ சேர்த்து இறக்கலாம்.

இப்போது சுவையான பீன்ஸ் பொரியல் தயார்.

வறுவல்/பொரியல் இல் பதிவிடப்பட்டது . குறிச்சொற்கள்: , , , , . 6 Comments »

உருளைக்கிழங்கு & ப்ரோக்கலி & பச்சைப்பயறு பொரியல்

 

தேவையானவை:

உருளைக்கிழங்கு _1
ப்ரோக்கலி_1
முழு பச்சைப் பயறு_ஒரு கைப்பிடி
சின்ன வெங்காயம்_5
பூண்டிதழ்_3
மஞ்சள்தூள்_சிறிது
மிளகாய்த்தூள்_2 டீஸ்பூன்
உப்பு_தேவைக்கு

தாளிக்க:

எண்ணெய்
சீரகம்
பெருஞ்சீரகம்
உளுத்தம்பருப்பு
பெருங்காயம்
கறிவேப்பிலை

செய்முறை:

முழு பச்சைப் பருப்பை முதல் நாளிரவே ஊறவைத்து விடவும்.அல்லது முளை கட்டிய பயறு என்றாலும் நன்றாகவே இருக்கும்.சமைக்கும்முன் ஒரு பாத்திரத்தில் போட்டு  அது மூழ்கும் அளவு தண்ணீர் விட்டு சிறிது உப்பு சேர்த்து அரை பதமாக‌ வேக வைத்து நீரை வடித்து வைக்கவும்

உருளைக் கிழங்கை வேகவைத்துத் தோலுரித்து விருப்பமான வடிவத்தில் நறுக்கி வைக்கவும்

ப்ரோக்கலியை சிறுசிறு பூக்களாகப் பிரித்து கழுவி நீரை வடிக்கவும்.வெங்காயம்,பூண்டு நறுக்கி வைக்கவும்

ஒரு கடாயில் எண்ணெய் விட்டு சூடானதும் தாளிக்க வேண்டியவற்றைத் தாளித்து விட்டு பூண்டு,வெங்காயம் சேர்த்து வதக்கவும்அது வதங்கியதும் உருளைக்கிழங்கு சேர்த்து வதக்கவும்

கூடவே மிளகாய்த்தூள்,மஞ்சள்தூள்,உப்பு சேர்த்து வதக்கி லேசாக தண்ணீர் தெளித்து மூடி வேக விடவும்

உருளை நன்றாக சிவந்து வந்ததும் வெந்த பச்சைப் பயறு,புரோக்கலியைச் சேர்த்துக் கிளறி விட்டு மீண்டும் மூடி மிதமானத் தீயில் வேக விடவும்

எல்லாம் ஒன்றாகக் கலந்து வந்ததும்  இறக்கவும்.தேவையானால் சிறிது தேங்காய்ப்பூ,கொத்துமல்லி இலை சேர்க்கலாம்.செய்யும்போது இவை இரண்டும்  இல்லாததால் நான் சேர்க்கவில்லை.

இது எல்லா வகையான சாதத்திற்கும் பொருத்தமாக இருக்கும்.

உருளைக்கிழங்கு,பெரும்பயறு,புரோக்கலி பொரியல்

தேவையானப் பொருள்கள்:

உருளைக்கிழங்கு_1
பெரும்பயறு_ஒரு கைப்பிடி
புரோக்கலி_1
பூண்டுப் பல்_2
சின்ன வெங்காயம்_3
மஞ்சள்தூள்_சிறிது
மிளகாய்த்தூள்_ஒன்றரை டீஸ்பூன்
தேங்காய்ப் பூ_ஒரு டீஸ்பூன் (தேங்காய் இல்லாததால் சேர்க்கவில்லை)
கொத்துமல்லி இலை_ஒரு கொத்து
உப்பு_தேவைக்கு

தாளிக்க:

நல்லெண்ணெய்
சீரகம்
பெருஞ்சீரகம்
பெருங்காயம்
கருவேப்பிலை

செய்முறை:

பெரும்பயறை அது மூழ்கும் அளவு தண்ணீர் விட்டு சிறிது உப்பு சேர்த்து குழையாமல் வேக வைத்துக்கொள்ளவும்.

வெங்காயம்,பூண்டு நறுக்கி வைக்கவும்.

உருளை,புரோக்கலி இவற்றை விருப்பமான வடிவத்தில்  நறுக்கிக்கொள்ளவும்.சிறு துண்டுகளாக இருந்தால் பயறுடன் பார்க்கும்போது ஒரே அளவாக இருக்கும்.

ஒரு பேனில் எண்ணெய் விட்டு சூடானதும் தாளிக்க வேண்டியவற்றைத் தாளித்து விட்டு பூண்டு,வெங்காயம் சேர்த்து வதக்கவும்.

அது வதங்கியதும் உருளைக்கிழங்கு,வெந்த பயறு சேர்த்து வதக்கவும்.

கூடவே மிளகாய்த்தூள்,மஞ்சள்தூள்,உப்பு சேர்த்து வதக்கி கொஞ்சம் தண்ணீர் விட்டு மூடி வேக வைக்கவும்.

இவை ஒன்றாகக் கலந்து வெந்ததும் புரோக்கலியைச் சேர்த்துக் கிளறி விட்டு மீண்டும் மூடி மிதமான தீயில் வேக விடவும்.

புரோக்கலி சீக்கிரமே வெந்துவிடும்.வெந்ததும்  தேங்காய்ப் பூ,கொத்துமல்லி இலை சேர்த்துக் கிளறி இறக்கவும்.

இது சாதம்,சப்பாத்தி இவற்றிற்குப் பொருத்தமாக இருக்கும்.

நூல்கோல் பொரியல்

தேவையானப் பொருள்கள்:

பச்சைப் பயறு_ 1/4 கைப்பிடி
கடலைப் பருப்பு_1/2 கைப்பிடி
நூல்கோல்_1 சிறியது (நூக்கல் என்றும் சொல்வார்கள்)
சின்ன வெங்காயம்_2
பச்சைமிளகாய்_ 1 (விருப்பமானால்)
மிளகாய்த்தூள்_ 1/2 டீஸ்பூன்
மஞ்சள் தூள்_சிறிது
தேங்காய்ப் பூ_ஒரு டீஸ்பூன் (விருப்பமானால்)
கொத்துமல்லி இலை_ஒரு கொத்து
உப்பு_தேவைக்கு

தாளிக்க:

நல்லெண்ணெய்
கடுகு
உளுந்து
சீரகம்
பெருங்காயம்
கறிவேப்பிலை

செய்முறை:

பருப்புகளை நன்றாகக் கழுவிவிட்டு,ஒரு வாணலியில் போட்டு அது வேகும் அளவை விட சிறிது கூடுதலாக தண்ணீர் விட்டு அடுப்பில் ஏற்றவும்.சிறிது மஞ்சள்தூள்,பெருங்காயம் சேர்த்து மூடி வேக வைக்கவும்.

வெங்காயம்,பச்சைமிளகாய்,நூல்கோல் இவற்றை விருப்பமான வடிவத்தில் நறுக்கி வைக்கவும்.

பருப்பு பாதி வெந்தபிறகு நறுக்கி வைத்துள்ளவற்றை அதனுடன் சேர்த்து, தேவையான உப்பும் சேர்த்து வேக வைக்கவும்.

காய் வெந்துகொண்டிருக்கும்போதே மிளகாய்த்தூளை சேர்த்துக் கிளறி விடவும்.

காய் வெந்து,நீர் வற்றியதும் தேங்காய்ப் பூ,கொத்துமல்லி இலை சேர்த்துக் கிளறிவிட்டு இறக்கவும்.

இப்போது ஒரு தாளிக்கும் கரண்டியில் சிறிது எண்ணெய் விட்டுக் காய்ந்ததும் தாளிக்க வேண்டியவற்றைத் தாளித்துப் பொரியலில் கொட்டிக்கிளறவும்.

இப்போது நூல்கோல் பொரியல் தயார்.

குறிப்பு:

இந்தக் காய்களில்தான் செய்ய வேன்டுமென்பதில்லை.இதனை விருப்பமான எல்லாக் காய்களிலும் செய்யலாம்.

குடை மிளகாய் & உருளைக்கிழங்கு பொரியல்

தேவையானப் பொருள்கள்:

உருளைக் கிழங்கு_1
குடைமிளகாய்_1
பூண்டு_2 பற்கள்
மிளகாய்த் தூள்_ஒரு டீஸ்பூன்
மஞ்சள் தூள்_சிறிது
உப்பு_தேவைக்கு

தாளிக்க:

நல்லெண்ணெய்_2  டீஸ்பூன்
சீரகம்
பெருஞ்சீரகம்
உளுந்து
பெருங்காயம்
கறிவேப்பிலை

குறிப்பு:

குடைமிளகாயையும்,உருளைக்கிழங்கையும் ஒன்றாக வதக்கி வேக வைத்தால் மிளகாயின் நிறம் மாறி இருக்கும்.எனவே முதலில் மிளகாயை வதக்கி எடுத்துக்கொண்டு பிறகு உருளைக்கிழங்கு வெந்தபிறகு சேர்த்தால் அதன் பச்சை நிறம் அப்படியே இருக்கும்.இதனை எந்த மிளகாயில் வேண்டுமானாலும் செய்துகொள்ளலாம்.

செய்முறை:

குடைமிளகாயைக் கழுவி சுத்தம் செய்து விருப்பமான வடிவத்தில் நறுக்கி வைக்கவும்.

உருளைக் கிழங்கை விருப்பமான வடிவத்தில் ந‌றுக்கி நீரில் போட்டு வைக்கவும்.பூண்டு உரித்து நறுக்கி/தட்டி வைக்கவும்.

ஒரு கடாயை அடுப்பில் வைத்து சிறிது எண்ணெய் விட்டு குடைமிளகாயைப் போட்டு,சிறிது உப்பு போட்டு  வதக்கவும்.வதங்கியதும் ஒரு கிண்ணத்தில் எடுத்து வைக்கவும்.

அதே கடாயில் மேலும் சிறிது எண்ணெய் விட்டு தாளிக்கக்கொடுத்துள்ளப் பொருள்களை ஒன்றன்பின் ஒன்றாகத் தாளித்துவிட்டு முதலில் பூண்டு சேர்த்து வதக்கவும்.

அடுத்து உருளைக் கிழங்கு சேர்த்து வதக்கி அது வேகும் அளவு தண்ணீர் ஊற்றி மூடி வேக வைக்கவும்.பாதி வெந்த நிலையில் மிளகாய்த் தூள், மஞ்சள் தூள்,உப்பு சேர்த்து பிரட்டி விட்டு மீண்டும் மூடி வேக வைக்கவும்.

உருளைக்கிழங்கு  நீர் வற்றி,நன்றாக ‌வெந்ததும் வதக்கி வைத்துள்ள குடைமிளகாயைச் சேர்த்துக் கிளறிவிடவும்.

உருளைக்கிழங்கும்,குடைமிளகாயும் நன்றாகக் கலந்ததும் இறக்கவும்.

இது எல்லா வகையான சாத‌த்திற்கும் நன்றாக இருக்கும்.

கேரட் & பீன்ஸ் பொரியல்

தேவையானப் பொருள்கள்:

பச்சைப் பயறு_ 1/2 கைப்பிடி
கேரட் _ 1 (சிறியது)
பீன்ஸ்_ ஏறக்குறைய 20 (எண்ணிக்கையில்)
சின்ன வெங்காயம்_2
பச்சைமிளகாய்_ 1 (விருப்பமானால்)
மிளகாய்த்தூள்_ 1/2 டீஸ்பூன்
மஞ்சள் தூள்_சிறிது
தேங்காய்ப் பூ_ஒரு டீஸ்பூன் (விருப்பமானால்)
கொத்துமல்லி இலை_ஒரு கொத்து
உப்பு_தேவைக்கு

தாளிக்க:

நல்லெண்ணெய்
கடுகு
உளுந்து
சீரகம்
கடலைப்பருப்பு
பெருங்காயம்
கறிவேப்பிலை

செய்முறை:

பாசிப்பருப்பை நன்றாகக் கழுவிவிட்டு, ஒரு வாணலியில் போட்டு அது வேகும் அளவை விட சிறிது கூடுதலாக தண்ணீர் விட்டு அடுப்பில் ஏற்றவும்.சிறிது மஞ்சள்தூள்,பெருங்காயம் சேர்த்து மூடி வேக வைக்கவும்.

வெங்காயம்,பச்சைமிளகாய்,கேரட்,பீன்ஸ் இவற்றை விருப்பமான வடிவத்தில் நறுக்கி வைக்கவும்.

பருப்பு பாதி வெந்தபிறகு நறுக்கி வைத்துள்ள காய்களை அதனுடன் சேர்த்து,தேவையான உப்பும் சேர்த்து வேக வைக்கவும்.

மூடி போட வேண்டாம்.போட்டால் பீன்ஸின் பச்சை நிறம் மாறிவிடும்.

காய்கள் வெந்துகொண்டிருக்கும்போதே மிளகாய்த்தூளை சேர்த்துக் கிளறி விடவும்.

காய்கள் வெந்து,நீர் வற்றியதும் தேங்காய்ப் பூ,கொத்துமல்லி இலை சேர்த்துக் கிளறிவிட்டு இறக்கவும்.

இப்போது ஒரு தாளிக்கும் கரண்டியில் சிறிது எண்ணெய் விட்டுக் காய்ந்ததும் தாளிக்க வேண்டியவற்றைத் தாளித்துப் பொரியலில் கொட்டிக்கிளறவும்.

இப்போது அருமையான கேரட்,பீன்ஸ் பொரியல் தயார்.

குறிப்பு:

இந்தக் காய்களில்தான் செய்ய வேன்டுமென்பதில்லை.இதனை விருப்பமான எல்லாக் காய்களிலும் செய்யலாம்.