சிவப்பரிசி பிடிகொழுக்கட்டை/Matta Raw Rice pidi kozhukkattai

எங்க வீட்டில் அடிக்கடி செய்யப்படும் திண்பண்டங்களில் கொழுக்கட்டையும் ஒன்று.விநாயகர் சதுர்த்திக்கு வாங்கிய சிவப்பரிசியில் சர்க்கரைப் பொங்கல், புட்டு,இடியாப்பம் எல்லாம் செய்தபிறகும் மீதமானதில் பிடிகொழுக்கட்டை செய்தேன்.நன்றாக இருந்தது.வாங்கினால் செய்து பார்க்கலாமே.

பல் முளைக்க ஆரம்பித்த குட்டிப் பிள்ளைகளுக்குச் செய்துகொடுத்தால்,அதன் இனிப்புச் சுவையினால்,கைகளில் வைத்துக்கொண்டு,விடாமல் அதைக் கடித்துக் குதப்பிக் கொண்டிருக்கும் அழகே அழகுதான்.

சாதாரண பச்சரிசிக்கும்,சிவப்பரிசியில் செய்வதற்கும் சுவையில் பெரிய வித்தியாசமில்லை.ஆனாலும் பச்சரிசியைவிட மென்மையாக இருக்கிற‌து. இடிப்பதும் எளிது.

தேவையானவை:

சிவப்புப் பச்சரிசி/மட்டரிசி_2 கப்
வெல்லம்_2 கப்
பச்சைப் பயறு_1 டேபிள்ஸ்பூன்
தேங்காய் கீற்று_1 (செய்த அன்று இல்லை என்பதால் சேர்க்கவில்லை)
எள்_1 டேபிள்ஸ்பூன்
ஏலக்காய்_1
உப்பு_துளிக்கும் குறைவாக(ருசிக்கு)

செய்முறை:

அரிசியைத் தண்ணீரில் ஊறவைத்து,நன்றாக ஊறியதும் நீரை வடித்துவிட்டு, மிக்ஸியில் போட்டு நைஸான,ஈரமாவாக இடித்துக்கொண்டு, இட்லிப் பானையில் வைத்து அவித்து,ஆறியதும் உதிர்த்துக்கொள்ள‌வும்.

பச்சைப்பயறை சிவக்க வறுத்து,ஆறியதும் அதனுடன் வேகுமளவு தண்ணீர் விட்டு கிள்ளுப்பதமாக வேகவைத்து வடித்துக்கொள்ளவும்.அல்லது வறுத்த பச்சைப்பயறை அப்படியேகூட சேர்த்துக்கொள்ளலாம்.

தேங்காய் போடுவதாக இருந்தால் அதனை சிறுசிறு பல்லாகக் கீறி வெறும் வாணலிலோ அல்லது நெய் சேர்த்தோ நன்கு சிவக்க வறுத்துக்கொள்ளவும்.

அதேபோல் எள்ளையும் வெறும் வாணலில் சூடுவர வறுத்துக்கொள்ளவும்.ஏலக்காயைப் பொடித்துக்கொள்ள‌வும்.

அவித்து,உதிர்த்து வைத்துள்ள மாவுடன்,பச்சைப்பயறு,தேங்காய்,எள், ஏலக்காய்,உப்பு சேர்த்து நன்றாகக் கலந்துகொள்ளவும்.

ஒரு பாத்திரத்தில் வெல்லத்தைப் பொடித்துப்போட்டு அது மூழ்குமளவு தண்ணீர் விட்டு சூடுபடுத்தவும்.வெல்லம் கரைந்ததும் தூசு&மண் போக வடித்துக்கொண்டு மீண்டும் அடுப்பிலேற்றவும்.

வெல்லம் கரைந்து நுரைத்துக்கொண்டு கொதிக்கும்போது மாவுக்கலவையில் சிறிதுசிறிதாக ஊற்றி,மத்தின் அடிப்பகுதியால் நன்றாகக் கிண்டவும்.

நன்றாகக் கிண்டிய பிறகு ஆறும்வரை வைத்திருந்து,ஆறியதும் படத்திலுள்ளதுபோல் செய்துகொள்ளவும்.

       

சிறு உருண்டை அளவிற்கு எடுத்து உள்ளங்கைகளில் வைத்து உருட்டி, உருண்டையாகவோ அல்லது உருண்டையை உள்ளங்கையில் வைத்து விரல்களால் அழுத்திப் பிடித்து,பிடி கொழுக்கட்டைகளாகப் பிடித்துக்கொள்ளவும். இவ்வாறே எல்லா மாவையும் செய்து கொள்ளவும்.

இட்லிப் பாத்திரத்தை அடுப்பிலேற்றி இட்லி அவிப்பதுபோலவே இட்லிக்கொத்தில் ஈரத்துணியைப்போட்டு அது கொண்டமட்டும் கொழுக்கட்டைகளை ஒன்றன்மீது ஒன்று ஒட்டாமல் அடுக்கி வைத்து வேகவைக்கவும்.

மாவு ஏற்கனவே வெந்திருப்பதால் கொழுக்கட்டை சீக்கிரமே வெந்துவிடும். கொழுக்கட்டையைக் கையால் தொட்டுப்பார்த்து,கையில் ஒட்டாமல் இருந்தால் எடுத்துவிடலாம்.

இவ்வாறே எல்லா கொழுக்கட்டைகளையும் வேகவைத்தெடுக்கவும்.சூடாகவோ அல்லது ஆறிய பிறகோ சாப்பிடலாம்.

அளவு குறைவாக (small quantity) இருப்பதாலோ என்னவோ,முதல் நாளைவிட அடுத்த நாள்தான் சூப்பராக இருக்கும்.

Advertisements

சிவப்பரிசிக் கொழுக்கட்டை/Rose matta raw rice kozhukattai

கொழுக்கட்டை இல்லாத விநாயகர் சதுர்த்தியா!இந்த முறை சிவப்பரிசியில் செய்துள்ளேன்.இளம் பிங்க் நிறத்தில் பார்க்கவே அழகாக இருந்தது.நீங்களும் செய்துபார்த்து,சுவைத்துவிட்டு வந்து சொல்லுங்க.

வெல்லம்,எள் இவற்றின் அளவை அவரவர் விருப்பம்போல் கூட்டிக் குறைத்துக்கொள்ள‌லாம்.

மேல் மாவிற்கு:

சிவப்புப் பச்ச‌ரிசி/மட்டரிசி_2 கப்
உப்பு_சிறிது

பூரணத்திற்கு:

வறுத்துத் தோலெடுத்த வேர்க்கடலை‍‍‍‍‍‍‍‍‍ ‍‍_1 கப்
பொடித்த வெல்லம்_ஒரு கப்
வறுத்த எள்_ஒரு டேபிள்ஸ்பூன்
ஏலக்காய்_1

செய்முறை:

சிவப்பரிசியைத் தண்ணீரில் ஊறவைத்து,ஊறியதும் நீரை வடித்து விடவும்.பிறகு மிக்ஸியில் போட்டு ஈர மாவாக,நைஸாக‌ இடித்துக்கொள்ளவும்.

இட்லிப்பாத்திரத்தை அடுப்பிலேற்றி சூடாகியதும் ஒரு இட்லித்தட்டை அதில் வைத்து,அதில் ஈரத்துணியைப்போட்டு மாவைப் போட்டு மூடி அவிக்கவும்.

சுமார் 10 லிருந்து 15 நிமிடங்களில் மாவு வெந்துவிடும்.மாவின் அளவைப்பொறுத்து வேகும் நேரம் மாறுபடும். மூடியைத்திறந்து மாவைக் கையால் தொட்டுப்பார்த்து,கையில் மாவு ஒட்டவில்லை என்றால் ஒரு பெரிய தட்டில் மாவை எடுத்துக்கொட்டி,கட்டிகளில்லாமல் உடைத்துவிட்டு, சிறிது உப்பு சேர்த்து இளஞ்சூடான தண்ணீரை சிறிது சிறிதாகத் தெளித்து கெட்டியாகப் பிசைந்துகொள்ளவும்.பிசைந்த மாவை உருட்டி ஒரு ஈரத்துணியால் மூடி வைக்கவும்.

பிசைந்த மாவு கைகளில் ஒட்டக்கூடாது.ஒட்டினால் இன்னும் மாவு கொஞ்சம் வேகவேண்டும்.அதற்கு மாவில் சிறிது தண்ணீரைத் தெளித்து மைக்ரோ அவனில் இரண்டு தடவை 1/2 நிமிடத்திற்கு வைத்து எடுத்தால் சரியாகிவிதும்.இது சரியாக வேகவில்லை என்றால் மட்டுமே.

வேர்க்கடலை,வெல்லம்,எள்,ஏலக்காய் இவற்றை மிக்ஸியில் போட்டு  pulse ல் வைத்து இரண்டு சுற்றுசுற்றி  கரகரப்பாக பொடித்துக்கொள்ளவும்.படத்தைப் பெரிதாக்கிப் பார்த்தால் தெரியும்.

பிசைந்த மாவில் சிறு எலுமிச்சை அளவு எடுத்து உள்ளங்கையில் வைத்து லேஸாக உருட்டி சிறு வட்டம் மாதிரி தட்டிக்கொண்டு,அதில் கொள்ளுமளவு கொஞ்சம் பூரணத்தை வைத்து படத்திலுள்ளதுபோல் மடித்து ஓரத்தை அழுத்திவிட‌வும்.

இதுபோல் எல்லாவற்றையும் செய்துகொள்ளவும்.அல்லது ஒரு தட்டு வேகும்போதே அடுத்த தட்டுக்கு செய்துகொள்ளலாம்.இட்லிப்பானயில் ஒரு தட்டை வைத்து அதில் ஈரத் துணியைப் போட்டு,ஒன்றன் மேல் ஒன்று ஒட்டாமல் அடுக்கி வேகவைக்கவும்.ஏற்கனவே மாவு வெந்துவிட்டதால் 5 லிருந்து 10 நிமிடத்திற்குள்ளாகவே வெந்துவிடும்.

       

மூடியைத் திறந்து தொட்டுப் பார்த்தால் கையில் ஒட்டாமல் இருந்தால் வெந்துவிட்டது எனலாம்.இட்லித்தட்டை அப்படியே எடுத்துக்கொட்டாமல் ஒவ்வொன்றாக எடுத்துவைக்கவும்.

இப்போது சுவையான இந்த சிவப்பரிசிக் கொழுக்கட்டைகளை எடுத்துச் சாப்பிட வேண்டியதுதான்.இதுவும் அன்றே சாப்பிடுவதைவிட அடுத்த நாள் இன்னும் சுவையாக இருக்கும்.

பச்சரிசியில் செய்த வெள்ளை வெளேர் கொழுக்கட்டைக்கு இங்கே செல்லவும்.

ஆவியில் வேக வைக்குமுன்                                                                                   வெந்த பிறகு

                                   

சிவப்பரிசி வடாம் (Rose matta rice vadaam)

சாதாரணமாக புழுங்கல் அரிசியில் அல்லது பச்சரிசியில் வடாம் செய்யும்போது நல்ல வெண்மையாக  இருக்கும். சிவப்பரிசியில் செய்யும்போது நிறத்தில் மட்டுமே சிறிது மாற்றம்.ஆனால் சுவை அவற்றைவிட நன்றாகவே இருந்தது.

தேவையானப் பொருள்கள்:

சிவப்பு புழுங்கல் அரிசி_2 கப்
ஜவ்வரிசி_ ஒரு கப்
பச்சை மிளகாய்_2
சீரகம்_ஒரு டீஸ்பூன்
பெருங்காயம்_சிறிது
உப்பு_தேவைக்கு

செய்முறை:

அரிசியைக் கழுவிக் களைந்து ஊற வைக்கவும்.சிவப்பரிசி ஊற நீண்ட நேரம் எடுக்கும்.சுமார் எட்டு மணி நேரமாவது ஊற வேண்டும்.

நன்றாக ஊறியதும் கிரைண்டரில் போட்டு மைய அரைத்தெடுக்கவும். கெட்டியாக இருக்க வேண்டுமென்பதில்லை,நீர்க்க இருக்கலாம்.

அதில் ஜவ்வரிசி,உப்பு சேர்த்து கரைத்து வைக்கவும்.ஜவ்வரிசி நன்றாக ஊறுமளவுக்கு சற்று நீர்க்க(ஓரளவுக்கு) இருக்க வேண்டும்.

இதை மாலையில் செய்து வைத்து விட வேண்டும்.காலையில் பார்த்தால் ஜவ்வரிசி ஊறி கெட்டியாக,பிசைந்த தட்டை மாவு பதத்தில் இருக்கும்.

இப்போது அதில் பச்சை மிளகாய்( அரைத்து சேர்க்க வேண்டும்),சீரகம், பெருங்காயம் சேர்த்து பிசைந்து கொண்டு,உப்பு+காரம் சரி பார்த்துக்கொள்ளவும்.பச்சைமிளகாயை அரிசி அரைக்கும்போதேகூட சேர்த்து அரைத்துக்கொள்ளலாம்.

இந்த மாவை அகலமான காசு வற்றல் போலவோ அல்லது முறுக்கு வற்றல் போலவோ பிழியலாம்.

இப்பொழுது மாவிலிருந்து ஒரு சிறு நெல்லிக்காய் அளவு எடுத்து ஒரு பேப்பர் டவலில்(அ)பிளாஸ்டிக் பேப்பரில் தட்டை போல் தட்டிக்கொள்ளவும்.இதுபோல் எல்லா மாவையும் தட்டி வைத்து இட்லிப் பானையில் இட்லி அவிப்பது போலவே  (ஒன்றுடன் ஒன்று ஒட்டாமல்) வேக வைக்க வேண்டும்.வெந்ததும் எடுத்து தட்டில் கொட்டி வெய்யிலில் காய வைக்கவும். வீட்டிற்குள்ளேயும் வைத்து உலரவிடலாம்.

அடுத்து முறுக்கு அச்சில் கொஞ்சமாக மாவை எடுத்துக்கொள்ளவும்.  இட்லிப் பானையை அடுப்பில் வைத்து ஒரு இட்லித் தட்டில் ஈரத்துணியைப் போட்டு ஒவ்வொரு குழியிலும் சிறுசிறு முறுக்குகளாக அல்லது தட்டு முழுவதும் ஒரு பெரிய முறுக்காக பிழிந்து விட்டு வேக விடவும்.நன்றாக வெந்ததும் எடுத்து தனித்தனியாக தட்டில் வைத்து வெய்யிலில் காயவைக்கவும். வீட்டிற்குள்ளேயும் வைத்து உலர்த்தலாம்.ஏற்கனவே வெந்து இருப்பதால் சீக்கிரமே காய்ந்துவிடும்.

நன்றாகக் காய்ந்த பிறகு ஒரு பிளாஸ்டிக் கவரில் (அ) கண்ணாடி பாட்டிலில்  எடுத்து வைத்துக் கொண்டால் தேவையானபோது பொரித்து சாப்பிடலாம்.

இது அனைத்து வகை சாதத்திற்கும் முக்கியமாக வத்தக்குழம்பிற்கு நல்ல பொருத்தமாக இருக்கும்.

சிவப்பரிசி இட்லி (Rose matta rice idli)

சிவப்பரிசியில் புழுங்கல் அரிசியாகப் பார்த்து வாங்க வேண்டும்.இதற்கும் புழுங்கல் அரிசி மாதிரியேதான் அளவு,மாவு அரைப்பது,கரைத்து வைப்பது எல்லாம்.ஆனால் அரிசி நன்றாக ஊறுவதற்கு நீண்ட நேரம் பிடிக்கும்.எனவே முதல் நாளிரவே ஊற வைத்துவிட வேண்டும்.

தேவையானப் பொருள்கள்:

சிவப்பரிசி_4 கப்
உளுந்து_1/4 கப்
வெந்தயம்_ஒரு டேபிள்ஸ்பூன்
உப்பு_தேவையான அளவு

செய்முறை:

அரிசியையும்,வெந்தயத்தையும் தனித்தனியாக‌ முதல் நாளிரவே,தூங்கச் செல்வதற்கு முன் ஊற வைத்து விட வேண்டும்.அடுத்த நாள் காலையில் உளுந்தை ஊற வைக்கவும்.குறைந்தது 4 மணி நேரமாவது ஊற வேண்டும். பிறகு தோலியைக் கழுவிவிட்டு ஃபிரிட்ஜில் சுமார் ஒரு 1/2 மணி நேரத்திற்கு வைக்கவும்.மாவு அரைப்பதற்கும் ஃபிரிட்ஜ் வாட்டரைப் பயன்படுத்தினால் உளுந்து நிறைய மாவு காணும்.

மாவு அரைக்கும்போது முதலில் உளுந்தையும்,வெந்தயத்தையும் கிரைண்டரில் போட்டு கொஞ்சம் தண்ணீர் ஊற்றி அரைக்கவும்.குறைந்தது 1/2 மணி நேரமாவது அரைக்க வேண்டும்.இடையிடையே தண்ணீர் சிறிது சிறிதாக சேர்த்து அரைக்கவும்.நன்றாக அரைத்த பிறகு,மாவைக் கையில் எடுத்துப் பார்த்தால் நுரைத்துக் கொண்டு இருக்கும்,அப்போது  ஒரு பாத்திரத்தில் வழித்து கைகளால் நன்றாகக் கொடப்பி வைக்கவும். அப்போதுதான் மாவு அமுங்காமல் இருக்கும்.

அடுத்து அரிசியைப் போட்டு தேவையான தண்ணீர் ஊற்றி மைய அரைக்கவும்.மாவு கெட்டியாக இல்லாமலும்,நீர்க்க இல்லாமலும் இருக்க வேண்டும்.புழுங்கல் அரிசிக்கு தேவைப்படும் தண்ணீரை விட இதற்கு கொஞ்சம் அதிகமாகத் தேவைப்படும்.நன்றாக அரைத்த பிறகு (இதற்கும் சுமார் 1/2 மணி நேரம் பிடிக்கும்.) வழித்து உளுந்து மாவுடன் சேர்த்து உப்பு போட்டு நன்றாகக் கொடப்பி கரைத்து வைக்கவும்.

அடுத்த நாள் பார்த்தால் மாவு நன்றாகப் பொங்கி வந்திருக்கும்.இட்லி அவிக்கும் பாத்திரத்தில் தேவையான அளவுத் தண்ணீர் ஊற்றி அதில் இட்லி தட்டை வைத்து ஈரத்துணியைப் போட்டு ஒவ்வொரு குழியிலும் மாவு ஊற்றி வேகவைக்கவும்.வெந்த பிறகு மூடியைத்திறந்து எடுத்துக் கொட்டவும். சிறிது இளஞ் சிவப்பாக, பஞ்சு போன்ற இட்லிகளாக வரும்.தோசை வேண்டும் எனில் கொஞ்சம் மாவைத் தனியாக எடுத்து, சிறிது நீர் விட்டுக் கரைத்து தோசையாக வார்க்கலாம்.

நமக்கு விருப்பமான சாம்பார்,சட்னி,புளிக் குழம்பு,அல்லது குருமாவுடன் சாப்பிடலாம்.